ଖୋର୍ଦ୍ଧା: କୃଷି ଓ କୃଷକଙ୍କ ବିକାଶ ପାଇଁ ରାଜ୍ୟ ସରକାର ଅନେକ ଯୋଜନା କରିଥିବା କଥା କହୁଛନ୍ତି । ବିଶେଷ କରି ଚାଷୀ ତା’ର ଉତ୍ପାଦିତ ଧାନକୁ ସରକାରୀ ମଣ୍ଡିରେ ବିକ୍ରି କରି ଲାଭ ପାଇପାରିବ ସେନେଇ ଖୋଲାଯାଇଛି ମଣ୍ଡି । ମାତ୍ର ଖୋର୍ଦ୍ଧା ଜିଲ୍ଲା ବୋଲଗଡ ବ୍ଳକ ବୋଲଗଡ ପଞ୍ଚାୟତରେ ଧାନ ମଣ୍ଡିରେ ଅବ୍ୟବସ୍ଥା ଦେଖାଦେଉଛି । ଯାହାଫଳରେ ମିଲରଙ୍କ ମନଇଚ୍ଛା କାମ ଯୋଗୁ ହଇରାଣ ହେଉଛନ୍ତି ଚାଷୀ । ଫଳରେ ବୁଧବାର ଚାଷୀମାନେ ସମବାୟ ସମିତି ଆଗରେ ଧାରଣା ଦେଇଛନ୍ତି ।
ତେବେ ଖୋର୍ଦ୍ଧା ଜିଲ୍ଲା ବୋଲଗଡ ବ୍ଳକ ବୋଲଗଡ ପଞ୍ଚାୟତରେ ଚଳିତ ବର୍ଷ ଭଲ ଧାନ ଅମଳ ହୋଇଛି । ଏହି ଅଞ୍ଚଳରେ ବହୁ ପୂର୍ବରୁ ମଣ୍ଡି ଖୋଲାଯାଇଛି । ମଣ୍ଡିରେ ଧାନ ବିକ୍ରି କରିବାକୁ ବିଭିନ୍ନ ସ୍ଥାନରୁ ଚାଷୀ ମଧ୍ୟ ଆସୁଛନ୍ତି । ହେଲେ ମିଲରଙ୍କ ମନଇଚ୍ଛା କାରବାର ଯୋଗୁ ଚାଷୀ ହଇରାଣ ହେଉଛନ୍ତି । ସଠିକ ଭାବେ ମିଲର ପ୍ୟାକ୍ସକୁ ଗାଡି ଯୋଗାଉନଥିବା ଅଭିଯୋଗ ହେଉଛି । ଫଳରେ ଧାନ ସବୁ ବାହାରେ ପଡିରହୁଛି । ଏଥିସହ ଧାନ ଗାଈ ଖାଇ ଦେଉଥିବା ଅଭିଯୋଗ ହୋଇଛି ।
ସୂଚନାନୁସାରେ, ବୋଲଗଡ ସମବାୟର ୨୮୭ ଜଣ ଚାଷୀ ଧାନବିକ୍ରି ପାଇଁ ରେଜିଷ୍ଟ୍ରେସନ୍ କରିଛନ୍ତି । ସମୁଦାୟ ୧୬ହଜାର କୁଇଣ୍ଟାଲ ଟ୍ୟାଗେଟ ଆସିଛି । କିନ୍ତୁ ବର୍ତ୍ତମାନ ତିନି ପାଳିରେ ମାତ୍ର ୨୪୦୦ କୁଇଣ୍ଟାଲ ଧାନ ବିକ୍ରି ହୋଇଥିବା ବେଳେ ବାକି ଧାନ ତୁରନ୍ତ ଉଠାଇବା ଦାବିରେ ବୋଲଗଡ ପଞ୍ଚାୟତ ଚାଷୀମାନେ ଏକତ୍ରୀତ ହୋଇ ସମବାୟ ସମିତି ଆଗରେ ଧାରଣା ଦେଇଥିଲେ ।
ସୂଚନା ପାଇଁ ବୋଲଗଡ ବ୍ଳକ ଯୋଗାଣ ନିରୀକ୍ଷକ ଓ ଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ଧାରଣା ଦେଇଥିବା ଚାଷୀମାନଙ୍କ ସହ ଆଲୋଚନା କରି ପ୍ରତ୍ୟେକ ବୁଧବାର ୧୨୦୦ କୁଇଣ୍ଟାଲ ଧାନ ବିକ୍ରି କରିବାକୁ ପ୍ରତିଶୃତି ଦେବା ପରେ ଚାଷୀମାନେ ଧାରଣାରୁ ହଟିଥିଲେ ।
ଏପଟେ ଆଗାମୀ ଦିନରେ ଯଦି ଏଭଳି ଅବ୍ୟବସ୍ଥା ପୁଣି ଦେଖାଦେବ ତେବେ ଚାଷୀମାନେ ରାଜରାସ୍ତାକୁ ଓହ୍ଲାଇବା ସହ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରିବେ ବୋଲି ଚାଷୀମାନେ ଚେତାବନୀ ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
