ଭୁବନେଶ୍ବର: ପୁଣି ଏକ ପାରିବାରିକ ବିବାଦରେ ଛନ୍ଦି ହୋଇଛନ୍ତି ବରିଷ୍ଠ ବିଜେଡି ନେତାଙ୍କ ପରିବାର । ଅନଙ୍ଗ ଉଦୟ ସିଂଦେଓଙ୍କ ପରେ ଏବେ ଆସିଛି ଶଶୀ ଭୂଷଣ ବେହେରାଙ୍କ ପରିବାର ନାଁରେ ଯୌତୁକ ନିର୍ଯାତନା ଅଭିଯୋଗ । ପୂର୍ବତନ ମନ୍ତ୍ରୀ ତଥା ଏବେର କେନ୍ଦ୍ରାପଡ଼ା ବିଧାୟକ ଶଶୀ ଭୂଷଣ ବେହେରା, ତାଙ୍କ ପୁଅ ସତ୍ୟପ୍ରକାଶ ବେହେରା ଓ ତାଙ୍କ ପରିବାର ନାଁରେ ବୋହୂ ସାଙ୍ଘାତିକ ଅଭିଯୋଗ ଆଣିଛନ୍ତି । ବୋହୂ ରୋନାଲି ବେହେରା ପୁରା ପରିବାର ନାଁରେ ବାଙ୍କୀ ଥାନାରେ ଯୌତୁକ ନିର୍ଯ୍ୟାତନା ନେଇ ଅଭିଯୋଗ କରିଛନ୍ତି । ଏ ନେଇ ବରିଷ୍ଠ ନେତା ଶଶୀ ଭୂଷଣ ବେହେରାଙ୍କ ପ୍ରତିକ୍ରିୟା ମିଳି ପାରିନାହିଁ ।
ଶଶି ଭୂଷଣ ବେହେରାଙ୍କ ସହ ତାଙ୍କ ସ୍ତ୍ରୀ, ପୁଅ-ଝିଅ ଓ ଅନ୍ୟ ସଦସ୍ୟଙ୍କ ନାଁରେ ଯୌତୁକ ନିର୍ଯାତନା ନେଇ FIRରେ ଉଲ୍ଳେଖ ରହିଛି । ଯୌତୁକ ନିର୍ଯ୍ୟାତନା ସହ ବୋହୂ ରୋନାଲିଙ୍କୁ ଉଭୟ ଶାରିରୀକ ଓ ମାନସିକ ନିର୍ଯ୍ୟାତନା ଦେଇ ଘରୁ ବାହାର କରି ଦିଆଯାଇଥିବା ବାଙ୍କୀ ଥାନାରେ ସେ ଅଭିଯୋଗ କରିଛନ୍ତି । ବିଧାୟକଙ୍କ ପୁଅ ସତ୍ୟ ପ୍ରକାଶ ବେହେରାଙ୍କ ସହ ଜଣେ ବିବାହିତ ମହିଳାଙ୍କର ଅନୈତିକ ସମ୍ପର୍କ ଥିବା ମଧ୍ୟ ଆଭିଯୋଗ କରିଛନ୍ତି ରୋନାଲି । ପୁଅର ସମସ୍ତ କାର୍ଯ୍ୟକଳାପ ସମ୍ପର୍କରେ ଜାଣି ବି ଶ୍ବଶୁର ଶଶି ବେହେରା ଏକଥାରେ କୌଣସି ବାରଣ ନକରୁନଥିଲେ । ଏହାସହ ତାଙ୍କୁ ଯୌତୁକ ନିର୍ଯାତନା ଦେବା ପାଇଁ ଶଶି ପରିବାର ଲୋକଙ୍କୁ ସମର୍ଥନ କରୁଥିବା ନେଇ ବୋହୂ ଅଭିଯୋଗ କରିଛନ୍ତି ।
ଅଭିଯୋଗ ଅନୁସାରେ, ୨୦୨୧ ମସିହାରେ କଟକ ବାଙ୍କୀ ଅଞ୍ଚଳର ଜଣେ ଅବସରପ୍ରାପ୍ତ ଜଜ୍ଙ୍କ ଝିଅଙ୍କ ସହ ନିଜ ପୁଅ ସତ୍ୟ ପ୍ରକାଶ ବେହେରାଙ୍କ ବିବାହ ପାଇଁ ପ୍ରସ୍ତାବ ଦେଇଥିଲେ ବିଜେଡି ବିଧାୟକ ଶଶି ବେହେରା । ବାହାଘର ନେଇ ଚୂଡାନ୍ତ ନିଷ୍ପତ୍ତି ହେବା ପରେ ପୂର୍ବତନ ମନ୍ତ୍ରୀଙ୍କ ପରିବାର ପକ୍ଷରୁ ରୋନାଲି ଓ ତାଙ୍କ ପରିବାର ଉପରେ କ୍ଷମତା ଅପବ୍ୟବାରର ପ୍ରହାର ଆରମ୍ଭ ହୋଇଥିଲା । ସୁନା ଗହଣାଠୁ ଆରମ୍ଭ କରି ଜିନିଷ ପତ୍ର ଯାଏଁ ଶଶି ବେହେରାଙ୍କ ପରିବାର ଲୋକେ ବାରମ୍ବାର ଝିଅକୁ ଲକ୍ଷ ଲକ୍ଷ ଟଙ୍କା ଆଣିବା ପାଇଁ ବାଧ୍ୟ କରିଥିବା ରୋନାଲିଙ୍କ ବାପା ଅଭିଯୋଗ କରିଛନ୍ତି । ଏ ସବୁ ଘଟଣା ବାବଦରେ ଶଶି ବେହେରା ସବୁ ଜାଣି ବି ଜାଣିଶୁଣି ଚୁପ ରହୁଛନ୍ତି ବୋଲି ଅଭିଯୋଗ ହୋଇଛି । ତେବେ ଏ ନେଇ ଶଶୀ ଭୂଷଣ ବେହେରା କିମ୍ବା ତାଙ୍କ ପରିବାର ଲୋକଙ୍କ ପ୍ରତିକ୍ରିୟା ମିଳି ପାରିନାହିଁ ।
ଇଟିଭି ଭାରତ, ଭୁବନେଶ୍ବର
