ପୁରୀରୁ ରାୟପୁରକୁ ବନ୍ଦେ ଭାରତ ଚଳାଚଳ ପାଇଁ ଦାବି, ସମୟ ଆସିଲେ ନିଶ୍ଚିତ ଗଡିବ କହିଲେ ଧର୍ମେନ୍ଦ୍ର

ପୁରୀରୁ ରାୟପୁରକୁ ତୃତୀୟ ବନ୍ଦେ ଭାରତ ଚଳାଇବା ପାଇଁ ଉଠିଲା ଦାବି । ଧର୍ମେନ୍ଦ୍ର କହିଲେ ସମୟ ଆସିଲେ ନିଶ୍ଚିତ ଗଡିବ ଟ୍ରେନ । ଅଧିକ ପଢନ୍ତୁ

ଭୁବନେଶ୍ବର: ପୁରୀରୁ ରାଉରକେଲା ପରେ ଏବେ ପୁରୀରୁ ରାୟପୁର ବନ୍ଦେ ଭାରତ ଟ୍ରେନ ପାଇଁ ଦାବି । ରାୟପୁରକୁ ତୃତୀୟ ବନ୍ଦେ ଭାରତ ଚଳାଇବା ପାଇଁ ଦାବି ଉଠାଇଛନ୍ତି ବିରୋଧ ଦଳର ନେତା ଜୟ ନାରାୟଣ ମିଶ୍ର । ଆଜି ନୂଆଦିଲ୍ଲୀରୁ ଭିଡିଓ କନଫରେସିଂ ଯୋଗେ ପୁରୀ-ରାଉରକେଲା ବନ୍ଦେ ଭାରତ ଏକ୍ସପ୍ରେସ୍ ଉଦଘାଟନ କରିଛନ୍ତି ପ୍ରଧାନମନ୍ତ୍ରୀ ନେରନ୍ଦ୍ର ମୋଦି । ପୁଣି ପୁରୀରୁ ରାୟପୁର ତୃତୀୟ ପର୍ଯ୍ୟୟ ଟ୍ରେନ ଗଡିବା ନେଇ ଦାବି ଉପରେ ରେଲମନ୍ତ୍ରୀଙ୍କ ସହ ଅଲୋଚନା କରିବେ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ତେବେ ବିଭିନ୍ନ ପ୍ରକଳ୍ପ ପାଇଁ ରାଜ୍ୟ ସରକାର ଏକ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରୁଥିବା କହିଛନ୍ତି ରାଜ୍ୟସଭା ସାଂସଦ ସୁଲତା ଦେଓ ।

ରାଜ୍ୟ ସଭା ସାଂସଦ ସୁଲତା ଦେଓ କହିଛନ୍ତି, ‘‘ରାଜ୍ୟରେ ଏବେବି 7ଟି ଜିଲ୍ଲାରେ ରେଳ ବ୍ୟବସ୍ଥା ନାହିଁ । ଯାହା ମୁଖ୍ୟମନ୍ତ୍ରୀଙ୍କ ପରିକଳ୍ପନା ରହିଛି ରେଳପଥ ପାଇଁ ଜାଗା ଦେବେ ଓ 50 ଭାଗ ଅର୍ଥ ମଞ୍ଜୁର କରିବେ । କେନ୍ଦ୍ର ଓ ରାଜ୍ୟ ମଧ୍ୟରେ ସମନ୍ବୟ ରହିଲେ 7ଟି ଜିଲ୍ଲାରେ ରେଳ ଗଡ଼ିପାରିବ । ଏହି ବନ୍ଦେ ଭରତ ଏକ୍ସପ୍ରେସ ସମସ୍ତଙ୍କୁ ଏକଜୁଟ ଦେଶବାସୀଙ୍କ ଏକଜୁଟ କରିବ ।’’

ବିରୋଧୀ ଦଳର ନେତା ଜୟ ନାରାୟଣ ମିଶ୍ର କହିଛନ୍ତି, ରାଜ୍ୟରେ ଦ୍ବିତୀୟ ବନ୍ଦେ ଭାରତ ଏକ୍ସପ୍ରେସକୁ ଗଡିବା ଆମପାଇଁ ଖୁସିର ବିଷୟ । ଲୋକଙ୍କର ଦାବି ରହିଛି ଆଉ ଗୋଟିଏ ବନ୍ଦେ ଭରତ ଟ୍ରେନ ପୁରୀରୁ ରାୟପୁର ଭାୟା ସମ୍ବଲପୁର ଦେଇ ଚାଲିବା ଅବଶ୍ୟକତା ରହିଛି । ଯାହା ଫଳରେ ଛତିଶଗଡ ସହିତ ଗମନାଗମନ ସୁବିଧା ହୋଇପାରିବ । ଛତିଶଗଡରୁ ବହୁତ ସଂଖ୍ୟାରେ ଶ୍ରଦ୍ଧାଳୁମାନେ ପୁରୀ ଶ୍ରୀଜଗନ୍ନାଥ ଦର୍ଶନ କରିବା ପାଇଁ ଆସିଥାନ୍ତି । ଏହାସହ କଳାହାଣ୍ଡି ବଲାଙ୍ଗୀରକୁ ମଧ୍ୟ ଏହା ଦ୍ଵାରା ଯୋଗାଯୋଗର ସୁବିଧା ହୋଇପାରିବ ।’’

କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, ‘‘ବନ୍ଦେ ଭାରତ ହେଉଛି ମୋଦି ସରକାରଙ୍କ ଓଡ଼ିଶା ପାଇଁ ଉପହାର । ପୂର୍ବରୁ ଓଡ଼ିଶାରେ ରେଳ କଥା କହିଲେ ଖୋର୍ଦ୍ଧାକୁ ହିଁ ବୁଝାଉଥିଲା । ଆଜି କିନ୍ତୁ ସେ ସମୟ ଆଉ ନାହିଁ । ତାର ବଡ ଉଦାହରଣ ଦିତୀୟ ବନ୍ଦେ ଭାରତ ଏକ୍ସପ୍ରେସ ପୁରୀରୁ ରାଉରକେଲା ଯୋଡ଼ି ହୋଇଛି । ଆଗକୁ ଯଦି ସମୟ ଆସେ ତେବେ ରାୟପୁରରୁ ସମ୍ବଲପୁର-ପୁରୀ ରୁଟ ଦେଇ ତୃତୀୟ ବନ୍ଦେ ଭାରତ ଏକ୍ସପ୍ରେସ ନିଶ୍ଚୟ ଚାଲିବ।’’

ଇଟିଭି ଭାରତ, ଭୁବନେଶ୍ବର