ଖୋର୍ଦ୍ଧା: 2013ର ପ୍ରଳୟଙ୍କାରି ବାତ୍ୟା ଫାଇଲିନ । ଏହି ବାତ୍ୟା ନାଁ ଧରିଲେ ଏବେ ବି ଲୋକଙ୍କ ଛାତିରେ ଛନକା ପଶିଯାଏ । ସମଗ୍ର ଓଡିଶାବାସୀଙ୍କ ମେରୁଦଣ୍ଡକୁ ଏହି ବାତ୍ୟା ଦୋହୋଲାଇ ଦେଇଥିଲା । ବାତ୍ୟରେ ଖୋର୍ଦ୍ଧା ଜିଲ୍ଲାର ଆର୍ଥିକ ସ୍ଥିତି ବିଶେଷ ଭାବେ ଧ୍ବଂସବିଧ୍ବସ୍ତ ହୋଇଥିଲା । ତେବେ ବାତ୍ୟାରେ ସର୍ବହରା ହୋଇଥିବା ଲୋକଙ୍କୁ ଯେଉଁ ଘର ଦିଆଯାଇଥିଲା ତାହା ଏବେ ଭଡାରେ ଲାଗିଥିବା ଶୁଣିବାକୁ ମିଳିଛି।
ତେବେ ବାସଗୃହ ନିର୍ମାଣ ହୋଇଥିବା ଜାଗାକୁ ସଂଯୋଗ କରିବାପାଇଁ ରାସ୍ତା ଓ ପାନୀୟ ଜଳର ବ୍ୟବସ୍ଥା ନାହିଁ । ଏନେଇ ଯେଉଁ ଲୋକଙ୍କୁ ଏଠାରେ ଘର ଦିଆଯାଇଛି ତା ମଧ୍ୟରୁ ଏଠାରେ ମାତ୍ର ଚାରୋଟି ପରିବାର ରହୁଥିବା ବେଳେ ଅନେକ ହିତାଧିକାରୀ ନିଜେ ନରହି ଘର ଭଡାରେ ଲଗାଇଥିବା ଜଣାପଡିଛି ।
ଯେଉଁମାନେ ବାତ୍ୟାରେ ସର୍ବସ୍ବ ହରାଇ ଏଠାରେ ରହୁଛନ୍ତି ସେମାନେ ଚରମ ସରକାରୀ ଅବହେଳାର ଶିକାର ହେଉଥିବା ବେଳେ ସରକାର ଏପର୍ଯ୍ୟନ୍ତ ଉକ୍ତ ଜାଗାର ପଟ୍ଟା ଦେଇନଥିବା ଅଭିଯୋଗ କରିଛନ୍ତି । କିନ୍ତୁ ଏ ସମ୍ପର୍କରେ ସ୍ଥାନୀୟ ବିଡ଼ିଓ କିମ୍ବା ଜିଲ୍ଲାପାଳ କିଛି କହିବାକୁ ମନା କରିଛନ୍ତି ।
ସୂଚନା ଅନୁସାରେ, ବାତ୍ୟାରେ ଖୋର୍ଦ୍ଧାର ବାଣପୁର, ଚିଲିକା ଏବଂ ଟାଙ୍ଗି ବ୍ଲକ ବେଶି କ୍ଷତିଗ୍ରସ୍ତ ହୋଇଥିଲା । ଜିଲ୍ଲାରେ ମୋଟ 22ଲକ୍ଷ 8ହଜାର 603ଜଣ ଲୋକ କ୍ଷତିଗ୍ରସ୍ତ ହୋଇଥିବା ସରକାରୀ ରିର୍ପୋଟ କହୁଛି । ସେଥିମଧ୍ୟରେ ଟାଙ୍ଗି ବ୍ଲକ ମଙ୍ଗଳାଯୋଡି ଗ୍ରାମ ପଞ୍ଚାୟତର 13 ଜଣ ହିତାଧିକାରୀଙ୍କ ପାଇଁ 3 ଲକ୍ଷ ଲେଖାଏଁ ଟଙ୍କା ବିନିମୟରେ ଓଡ଼ିଆରଏଫ ଯୋଜନାରେ ବାସଗୃହ ନିର୍ମାଣ ହୋଇଥିଲା ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
