ଭୁବନେଶ୍ବର: ଧାମନଗର ଓ ପଦ୍ମପୁର ଉପନିର୍ବାଚନରେ ଶୋଚନୀୟ ପରାଜୟ ପରେ କଂଗ୍ରେସ କରିବ ଆତ୍ମସମୀକ୍ଷା । ସାଧାରଣ ନିର୍ବାଚନ ଆଗୁଆ ହେବା ନେଇ କଳ୍ପନାଜଳ୍ପନା ପ୍ରକାଶ ପାଇବା ପରେ ବିଜେଡି, ବିଜେପି ଏବଂ କଂଗ୍ରେସ ନିଜକୁ ପ୍ରସ୍ତୁତ କରିବାକୁ ଆକ୍ସନ ପ୍ଲାନ ପ୍ରସ୍ତୁତ କରିଛନ୍ତି ।
ତେବେ ଆସନ୍ତା ୧୮ ତାରିଖ (ରବିବାର) କେନ୍ଦ୍ରୀୟ ପ୍ରଭାରୀ ଚେଲ୍ଲା କୁମାରଙ୍କ ଉପସ୍ଥିତିରେ ଦଳର ସମସ୍ତ ବରିଷ୍ଠ ଓ କନିଷ୍ଠ ନେତା ଉପସ୍ଥିତ ରହି ୨୦୨୪ ସାଧାରଣ ନିର୍ବାଚନ ପୂର୍ବରୁ ସମୀକ୍ଷା କରିବେ ବୋଲି କହିଛନ୍ତି ବରିଷ୍ଠ କଂଗ୍ରେସ ବିଧାୟକ ସୁର ରାଉତରାୟ ।
୨୦୨୪ ପୂର୍ବରୁ ତୃଣମୂଳ ସ୍ତରରୁ ସଂଗଠନକୁ ସୁଦୃଢ କରିବା ଲକ୍ଷ୍ୟରେ ଅଣ୍ଟା ଭିଡ଼ିଲେ ରାଜନୈତିକ ଦଳ । କ୍ଷମତା ହାସଲ କରିବା ପାଇଁ ପ୍ରସ୍ତୁତି ଜୋରଦାର ହେଲା । ନବୀନ ନିବାସରେ ବିଜେଡି ପକ୍ଷରୁ ‘ପଦ୍ମପୁର ମଡେଲ’କୁ ଅନ୍ୟ ନିର୍ବାଚନ ମଣ୍ଡଳୀରେ ବ୍ୟବହାର କରି ଭୋଟ ହାତେଇବା ପାଇଁ ବିଜେଡିର ରଣନୀତି ପ୍ରସ୍ତୁତ । ବିଜେପି ମଧ୍ୟ ଆସନ୍ତା ୧୭ ତାରିଖରେ ପ୍ରଭାରୀଙ୍କ ଉପସ୍ଥିତିରେ ସମୀକ୍ଷା କରିବ । ଲୋକଙ୍କ ସହ କେନ୍ଦ୍ରୀୟ ଯୋଜନା କେମିତି ପହଞ୍ଚୁଛି ତାକୁ ନେଇ ତୃଣମୂଳ ସ୍ତରକୁ ଯିବ । କଂଗ୍ରେସ ମଧ୍ୟ ପଞ୍ଚାୟତ ଠାରୁ ଆରମ୍ଭ କରି ବ୍ଲକ ପର୍ଯ୍ୟନ୍ତ ନିଜର ଆଧିପତ୍ୟ କିଭଳି ବିସ୍ତାର କରିବ ଓ ଲୋକଙ୍କ ନିକଟତର ହେବ ସେନେଇ ଆସନ୍ତା ୧୮ ତାରିଖ (ରବିବାର) କଂଗ୍ରେସ ଭବନରେ ଏକ ଗୁରୁତ୍ବପୂର୍ଣ୍ଣ ବୈଠକ ଡକାଯାଇଛି ।
କେନ୍ଦ୍ରୀୟ ପ୍ରଭାରୀ ଚେଲ୍ଲା କୁମାରଙ୍କ ଉପସ୍ଥିତିରେ ଆତ୍ମ ସମୀକ୍ଷା କରିବ ଦଳ । ସାଧାରଣ ନିର୍ବାଚନ ଆଗୁଆ ହେବା ନେଇ କଳ୍ପନାଜଳ୍ପନା ପ୍ରକାଶ ପାଇବା ପରେ ରାଜନୈତିକ ମହଲରେ ତତ୍ପରତା ପ୍ରକାଶ ପାଇଛି । ବିଜେଡି, ବିଜେପି ଏବଂ କଂଗ୍ରେସ ନିଜକୁ ପ୍ରସ୍ତୁତ କରିବାକୁ ଆକ୍ସନ ପ୍ଲାନ ପ୍ରସ୍ତୁତ କରିଛନ୍ତି । କଂଗ୍ରେସ ତୃଣମୂଳସ୍ତରରୁ ଅଧିକ କ୍ରିୟାଶୀଳ ହେବା ପାଇଁ ୧୮ ତାରିଖ ଦିନ ଆତ୍ମ ଚିନ୍ତନ କରିବା ନେଇ ସୂଚନା ଦେଇଛନ୍ତି ବରିଷ୍ଠ କଂଗ୍ରେସ ବିଧାୟକ ସୁର ରାଉତରାୟ । ସେ କହିଛନ୍ତି, "ଏହି ବୈଠକରେ ସମସ୍ତ କଂଗ୍ରେସ ନେତା ଏକାଠି ହେବେ । ସମସ୍ତ ବିଧାୟକ, ସାଂସଦ, ପୂର୍ବତନ ବିଧାୟକ, ବରିଷ୍ଠ ଓ କନିଷ୍ଠ ସମସ୍ତେ ଉପସ୍ଥିତ ରହିବେ । ନେତାଙ୍କୁ ଦାୟିତ୍ବ ଦିଆଯିବ । ଆଗାମୀ ଦିନରେ କଂଗ୍ରେସ ଅଧିକ ସଂଗଠିତ ହୋଇ ସାଧାରଣ ନିର୍ବାଚନରେ ଭଲ ପଦର୍ଶନ କରିବ ।"
ଇଟିଭି ଭାରତ, ଭୁବନେଶ୍ବର
