ଭୁବନେଶ୍ବର: ସହରର ହୋଟେଲରେ ରହୁଥିବା ଲୋକଙ୍କ ଉପରେ ନଜର ରଖିବା ପାଇଁ କମିଶନରେଟ ପୋଲିସ ଆରମ୍ଭ କରିଥିଲା ସରାଇ ଆପ୍ । କିନ୍ତୁ ତାହା ଏବେ ଅଚଳ । ସରାଇ ଆପକୁ ଆର୍ଥିକ ଅଭାବରୁ ବନ୍ଦ କରିଦେଇଛି କମିଶନରେଟ ପୋଲିସ । ଫଳରେ ହୋଟେଲରେ ରହୁଥିବା ଲୋକଙ୍କ ଖବର ନାହିଁ ପୋଲିସ ପାଖରେ । ଗୋଟିଏ ପଟେ ଜି20 ଆନ୍ତର୍ଜାତିକ ସମ୍ମିଳନୀ ପାଇଁ ସହରରେ ସୁରକ୍ଷାକୁ କଡାକଡି କରାଯାଇଥିବା ବେଳେ ଅନ୍ୟପଟେ କିନ୍ତୁ ବଡ ସୁରକ୍ଷା ଉପରୁ ପୋଲିସ ଯେପରି ନଜର ହଟାଇ ଦେଇଛି ।
ସହରରେ ପୁଳା ପୁଳା ଛୋଟ ବଡ଼ ହୋଟେଲ ରହିଛି । ଯେଉଁଠି ରାଜ୍ୟ ତଥା ରାଜ୍ୟ ବାହାର ସମେତ ବିଦେଶରୁ ଲୋକ ଆସି ମଧ୍ୟ ରହୁଛନ୍ତି । ହେଲେ ହୋଟେଲରେ କିଏ ରହୁଛି, କାହିଁକି ରହୁଛି, କେଉଁ ଉଦ୍ଦେଶ୍ୟରେ ରହୁଛି ସେ ନେଇ କିନ୍ତୁ କମିଶନରେଟ୍ ପୋଲିସ ପାଖରେ ଖବର ଅଛି କି ନାହିଁ ତାହା ଜଣାନାହିଁ ।
ହୋଟେଲ ଓ ଲଜରେ ରହି ଅପରାଧ ଘଟାଉଥିବା ଅପରାଧୀଙ୍କ ଉପରେ ନଜର ରଖିବା ପାଇଁ ଗତ 2021ରେ ସରାଇ ଆପ ଲଞ୍ଚ କରିଥିଲା କମିଶନରେଟ ପୋଲିସ । ଗେଷ୍ଟ ହାଉସ ବା ହୋଟେଲରେ ରହୁଥିବା ପେଇଙ୍ଗ ଗେଷ୍ଟଙ୍କ ସମସ୍ତଙ୍କ ତଥ୍ୟ ଏହି ଆପରେ ଅପଡେଟ ହେଉଥିଲା । କେବେ କିଏ ଆସିଲେ, କିଏ କେଉଁଠି ରହିଲେ । ସେମାନଙ୍କ ଅସଲ ପରିଚୟ ଓ ପରିଚୟ ପତ୍ର ଡିଜିଟାଲ ଡାଟା ସବୁ ଆପରେ ହେଉଥିଲା ଅପଡେଟ । କିନ୍ତୁ ଏବେ ଆପ ଅଚଳ ହୋଇଯାଇଥିବାରୁ ହୋଟେଲ ଗୁଡିକରେ କିଏ ରହୁଛି କଣ କରୁଛି ତାହାର ତଥ୍ୟ ନାହିଁ ପୋଲିସ ପାଖରେ ।
ଆପ ବନ୍ଦ ହେବା ଯୋଗୁ ଏବେ ହୋଟେଲରେ ରହୁଥିବା ଲୋକଙ୍କ ଗତି ବିଧି ଉପରେ ସଠିକ ଭାବେ ନଜର ରଖିବା ସମ୍ଭବ ପର ହୋଇପାରୁନାହିଁ । ଜି 20 ସମ୍ମିଳନୀ ଉଦଯାପିତ ହୋଇଥିବା ବେଳେ ସମ୍ମିଳନୀ ସମୟରେ ସହରରେ କଡା ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଥିଲା । କିନ୍ତୁ ଅପରାଧୀଙ୍କ ଉପରେ ନଜର ରଖିବାକୁ ଆରମ୍ଭ ହୋଇଥିବା ଆପ କାମ ନକରିବା ଏବେ କମିଶନରେଟ ପୋଲିସର ସୁରକ୍ଷା ବ୍ୟବସ୍ଥା ଓ ବନ୍ଦୋବସ୍ତ ନେଇ ଅନେକ ପ୍ରଶ୍ନ ସୃଷ୍ଟି କରିଛି ।
ବର୍ଷକ ତଳେ ହୋଟେଲରେ ହେଉଥିବା ଅପରାଧିକ କାର୍ଯ୍ୟକଳାପ ବା ସହରରେ ରହୁଥିବା ବିଦେଶୀ ଅତିଥିଙ୍କ ଉପରେ ନଜର ରଖିବାକୁ ସରାଇ ଆପକୁ ଆରମ୍ଭ କରିଥିଲା କମିଶନରେଟ ପୋଲିସ । ଯାହା ଦ୍ବାରା ପୋଲିସକୁ ହୋଟେଲକୁ ଆସିବାକୁ ପଡୁନଥିଲା । ପୋଲିସ ପାଖରେ ହୋଟେଲରେ ରହୁଥିବା ଅତିଥିଙ୍କ ତଥ୍ୟ ସଠିକ ସମୟରେ ପହଞ୍ଚିଯାଉଥିଲା । ଏବେ କିନ୍ତୁ ଏହି ଆପକୁ ଲଗ୍ ଇନ୍ କଲେ ଆସେସ ଡିନାଏ ଲେଖୁଛି । ଅର୍ଥାତ୍ ଏହା କାର୍ଯ୍ୟକ୍ଷମ ନାହିଁ ବୋଲି ଜଣାପଡିଛି । ଫଳରେ ହୋଟେଲ କର୍ତ୍ତୃପକ୍ଷ ଚିନ୍ତାରେ । କାରଣ ସହରରେ ସମ୍ମିଳନୀ ଆୟୋଜନ ସମୟରେ ପୋଲିସ କିପରି ସରାଇ ଆପ ଆଡ଼କୁ ଧ୍ୟାନ ହଟାଇ ଦେଇଛି ତାହାକୁ ନେଇ ଏବେ ପ୍ରଶ୍ନ ଉଠୁଛି । ହୋଟେଲରେ କିଏ ରହୁଛି । ସହରରେ ମାଳ ମାଳ ବିଦେଶୀ ରହୁଥିବା ବେଳେ ସେମାନଙ୍କ ସୁରକ୍ଷା ଆଡ଼କୁ କେତେ ଗୁରୁତ୍ବ ଦେଉଛି ପୋଲିସ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ଇଟିଭି ଭାରତ, ଭୁବନେଶ୍ବର
