ଖୋର୍ଦ୍ଧା: ଜିଲ୍ଲାର ଚିଲିକା ନିର୍ବାଚନମଣ୍ଡଳୀରେ ଦିନକୁ ଦିନ କାୟା ବିସ୍ତାର କରିବାରେ ଲାଗିଛି ମହାମାରୀ କୋରୋନା । ଏଥିରୁ ବାଦ ପଡୁନାହାନ୍ତି କୋରୋନା ଯୋଦ୍ଧା । ଶୁକ୍ରବାର ବାଣପୁର ଥାନା ଏବଂ ନାଚୁଣୀ ଫାଣ୍ଡିର 10 ଜଣ କରୋନା ଯୋଦ୍ଧାଙ୍କ ରିପୋର୍ଟ ପଜିଟିଭ ଆସିଛି । ଯାହା ଅଞ୍ଚଳବାସୀଙ୍କ ପାଇଁ ଚିନ୍ତାର ବିଷୟ ପାଲଟିଛି ।
ଏହି 10 କରୋନା ଯୋଦ୍ଧାଙ୍କ ମଧ୍ୟରେ ଜଣେ ଏସଆଇ, ଦୁଇଜଣ ଏଏସଆଇ, ତିନିଜଣ କନେଷ୍ଟବଳ, ଦୁଇ ହୋମଗାର୍ଡ ଓ ଦୁଇ ଜଣ ଓଏସଏପି କର୍ମଚାରୀ ରହିଥିବା ସୂଚନା ମିଳିଛି । ଜନସାଧାରଣଙ୍କ ସୁରକ୍ଷା ପାଇଁ ବିଗତ ଚାରି ମାସ ହେଲା ନିରବଚ୍ଛିନ୍ନ ଭାବେ ନିଜ ଜୀବନ ପ୍ରତି ବିପଦ ସତ୍ତ୍ବେ ସେବା କରୁଥିବା ଏହି ଯୋଦ୍ଧାମାନେ ଆକ୍ରାନ୍ତ ହେବା ସ୍ଥାନୀୟ ଅଞ୍ଚଳରେ ଚିନ୍ତା ବଢାଇଛି ।
ରିପୋର୍ଟ ଆସିବା ପରେ ଘଟଣାକୁ ଗୁରୁତର ଭାବେ ନେଇ ଖୋର୍ଦ୍ଧା ଜିଲ୍ଲାପାଳ ସୀତାଂଶୁ ରାଉତ ଆସନ୍ତା ୪୮ ଘଣ୍ଟା ଯାଏଁ ବାଣପୁର ଥାନା ଏବଂ ନାଚୁଣୀ ଫାଣ୍ଡିକୁ କଣ୍ଟନମେଣ୍ଟ ଜୋନ ଭାବେ ଘୋଷଣା କରିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
