ଖୋର୍ଦ୍ଧା: ଇଶ୍ବରଙ୍କ ସୃଷ୍ଟି ବଡ଼ ବିଚିତ୍ର । ଜଣେ ସୁସ୍ଥସବଳ ବ୍ୟକ୍ତି କେତେବେଳେ ହାତରେ କପଡ଼ା ଗୁଡ଼ାଇ କୁଷ୍ଠରୋଗୀ ସାଜି ଭିକ୍ଷାବୃତ୍ତି କରୁଛି ତ ପୁଣି କେତେବେଳେ ଜଣେ ଶାରୀରିକ ଅକ୍ଷମ କାହାରି ଆଗରେ ହାତ ନପତାଇ ନିଜ ପରିଶ୍ରମ ବଳରେ ଚଳାଉଛି ନିଜର ବିରାଟ ପରିବାର । ଏପରି କ୍ଷେତ୍ରରେ ଜଣେ ଦିବ୍ୟାଙ୍ଗ ସାଜିଛନ୍ତି ଅନ୍ୟପାଇଁ ଉଦାହରଣ । ଚାଲନ୍ତୁ ଜାଣିବା ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ ପଙ୍ଗାରସିଂହ ପଞ୍ଚାୟତ ଚିରାମାରୁ ଗ୍ରାମର ନରସିଂହ ରାଉତଙ୍କ ବିଷୟରେ ।
ନାଁ ନରସିଂହ ରାଉତ । ପିଲାବେଳୁ ଦିବ୍ୟାଙ୍ଗ । ହେଲେ ସେ କାହାରି ଆଗରେ କେବେ ହାତ ପତାଇ ନାହାନ୍ତି ବରଂ ନିଜର ପରିଶ୍ରମ ବଳରେ ଚଳାଉଛନ୍ତି ୧୦ ଜଣିଆ ପରିବାର । ନରସିଂହ ଯେତେବେଳେ ଛୋଟ ହୋଇଥିଲେ ସେବେଠାରୁ ତାଙ୍କ ଦୃଷ୍ଟିଶକ୍ତି ହରାଇ ଥିଲେ । ପରେ ପରିବାର ଲୋକଙ୍କ ବହୁ ପ୍ରଚେଷ୍ଟା ପରେ ବି ଭଲ ହୋଇନଥିଲା । ଆଉ ତା ପରେ ବୋଝ ଉପରେ ନଳିତା ବିଡା ପରି ସାନ ଭାଇଙ୍କ ମୃତ୍ୟୁ ପରେ ପୁରା ପରିବାରର ଦାୟିତ୍ବ ମୁଣ୍ଡାଇଥିଲେ ସେ । ଜଳଖିଆ ଦୋକାନ କରି ପରିବାର ପ୍ରତିପୋଷଣ କରିବା ସହ ସବୁଥିରେ ପାରଙ୍ଗମ ନରସିଂହ ।
କୌଣସି ସମସ୍ୟାରେ ହାର ନମାନି ଆଗେଇ ଚାଲିଛନ୍ତି ସେ । ହେଲେ ସବୁଠାରୁ ବଡ କଥା ହେଲା କିଛି ପ୍ରଶାସନିକ ଅଧିକାରୀଙ୍କ ଆନ୍ତରିକତାର ଅଭାବ ଯୋଗୁଁ ଯୋଗ୍ୟ ହିତାଧିକାରୀ ଭାବେ ସରକାରୀ ଯୋଜନାରୁ ବଞ୍ଚିତ ରହିଛନ୍ତି ନରସିଂହ । ଯାହା ସରକାରଙ୍କ ଗରିବ କଲ୍ୟାଣ ଯୋଜନା ଉପରକୁ ଅଙ୍ଗୁଳି ନିର୍ଦ୍ଦେଶ କରିଛି । ନରସିଂହଙ୍କ ସମ୍ପର୍କରେ ଆମେ ବେଗୁନିଆ ବିଡ଼ିଓ ଏବଂ ଖୋର୍ଦ୍ଧା ଜିଲ୍ଲାପାଳଙ୍କୁ ଅବଗତ କରିଥିଲେ ମଧ୍ୟ ସେ କ୍ୟାମେରା ସାମ୍ନାରେ କିଛି କହିବାକୁ ମନାକରି ଦେଇଛନ୍ତି ।
ନିଜ ଗୋଡରେ ନିଜେ ଛିଡା ହୋଇଥିବା ଦୃଷ୍ଟିବାଧିତ ନରସିଂହଙ୍କୁ କେବେ ଆବାସ ଯୋଜନାରେ ଘର ଖଣ୍ଡେ ମିଳୁଛି ତାହା ଦେଖିବାକୁ ବାକି ରହିଲା ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
