ଭୁବନେଶ୍ବର: ୨୦୨୪ ସାଧାରଣ ନିର୍ବାଚନ ପୂର୍ବରୁ ରାଜ୍ୟ ବିଜେପିର ବଡ ପରିବର୍ତ୍ତନ । ବଦଳିଲେ ରାଜ୍ୟ ବିଜେପି ସଭାପତି । ଓଡି଼ଶା ବିଜେପି ସଭାପତି ହେଲେ ବରିଷ୍ଠ ନେତା ମନମୋହନ ସାମଲ । ସମୀର ମହାନ୍ତିଙ୍କ ସ୍ଥାନ ନେଲେ ମନମୋହନ । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ତାଙ୍କୁ ରାଜ୍ୟ ବିଜେପି ସଭାପତି ଭାବେ ନିଯୁକ୍ତ କରିଛନ୍ତି । ମନମୋହନ ପୂର୍ବରୁ ମଧ୍ୟ ରାଜ୍ୟ ବିଜେପି ସଭାପତି ଥିଲେ । ୧୯୯୯ ରୁ ୨୦୦୪ ପର୍ଯ୍ୟନ୍ତ ରାଜ୍ୟ ସଭାପତି ଭାର ତୁଲାଇଥିଲେ । ସେତେବେଳେ ରାଜ୍ୟରେ ମେଣ୍ଟ ସରକାର ଥିଲା । ୨୦୦୪ ବିଧାନସଭା ନିର୍ବାଚନରେ ଧାମନଗରରୁ ନିର୍ବାଚିତ ହୋଇଥିଲେ ମନମୋହନ । ତେବେ ୨୦୦୪ରୁ ୨୦୦୯ ଯାଏଁ ବିଧାୟକ ଥିବା ମନମୋହନ ମେଣ୍ଟ ସରକାର ସମୟରେ ମନ୍ତ୍ରୀମଣ୍ଡଳରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ଏବଂ ରାଜସ୍ବ ମନ୍ତ୍ରୀ ଭାବେ ମଧ୍ୟ କାର୍ଯ୍ୟ କରିଥିଲେ ।
ଆଗକୁ ୨୦୨୪ ନିର୍ବାଚନ ଥିବାବେଳେ ମନମୋହନଙ୍କୁ ଏହି ଦାୟିତ୍ୱ ଦେଇ ନିର୍ବାଚନ ପ୍ରସ୍ତୁତିକୁ ବିଜେପି ଜୋରଦାର କରୁଥିବା ସଂକେତ ମିଳିଛି । ଧାମନଗର ଉପନିର୍ବାଚନରେ ଦଳର ବିଜୟରେ ମନମୋହନଙ୍କର ମୁଖ୍ୟ ଭୂମିକା ରହିଥିଲା । ଯେଉଁଥିପାଇଁ ତାଙ୍କୁ ସଭାପତି ପଦ ପୁରସ୍କାରରେ ମିଳିଛି ବୋଲି ଚର୍ଚ୍ଚା ହେଉଛି । ମନମୋହନଙ୍କ ନେତୃତ୍ୱରେ ଦଳ ୨୦୨୪ ନିର୍ବାଚନ ମୈଦାନକୁ ଓହ୍ଲାଇବ ଏବଂ ଏଥିପାଇଁ ରଣନୀତି ପ୍ରସ୍ତୁତ କରୁଛି ବିଜେପି ।
ବିଜେପିର ଫୋକସ ଏବେ ଉପକୂଳ ଓଡିଶା ଉପରେ । ଏହା ଉପରେ ପ୍ରତିକ୍ରିୟାରେ ଧାମନଗର ବିଧାୟକ ସୂରଜ ସୂର୍ଯ୍ୟବଂଶୀ କହିଛନ୍ତି, ''ମନମୋହନ ସାମଲ ଜଣେ ଅଭିଜ୍ଞ ନେତା । ଧାମନଗର ଉପନିର୍ବାଚନରେ ଜିତିବାରେ ତାଙ୍କର ପ୍ରମୁଖ୍ୟ ଭୂମିକା ଥିଲା । ତାଙ୍କ ନେତୃତ୍ଵରେ ବିଜେପି ସଫଳତାର ଶୀର୍ଷ ପହଞ୍ଚିବ ବୋଲି ଆଶା କରାଯାଉଛି ।''
ମନମୋହନ ସାମଲ ୨୦୦୯ ବିଧାନସଭା ନିର୍ବାଚନରେ ଭଣ୍ଡାରିପୋଖରୀ ନିର୍ବାଚନ ମଣ୍ଡଳୀରୁ ଭାରତୀୟ ଜନତା ପାର୍ଟିରୁ ନିର୍ବାଚନ ଲଢିଥିଲେ । ହେଲେ ନିର୍ବାଚନରେ ତାଙ୍କର ପରାଜୟ ହୋଇଥିଲା । ବିଜୁ ଜନତା ଦଳର ପ୍ରାର୍ଥୀ ପ୍ରଫୁଲ୍ଲ ସାମଲ ତାଙ୍କୁ ହରାଇ ବିଜୟୀ ହୋଇଥିଲେ । ଏହାପରେ ୨୦୧୪ ନିର୍ବାଚନରେ ସେ ଚାନ୍ଦବାଲି ନିର୍ବାଚନ ମଣ୍ଡଳୀରୁ ବିଜେପି ପ୍ରାର୍ଥୀ ଭାବେ ପ୍ରତିଦ୍ବନ୍ଦିତା କରିଥିଲେ । କିନ୍ତୁ ବିଜେଡି ପ୍ରାର୍ଥୀ ବ୍ୟୋମକେଶ ରାୟଙ୍କ ଠାରୁ ଏଥର ମଧ୍ୟ ତାଙ୍କୁ ପରାଜିତ ହେବାକୁ ପଡିଥିଲା ।
