ଖୋର୍ଦ୍ଧା: କୋରୋନା କଟକଣା ମଧ୍ୟରେ ଲୋକଙ୍କ ପାଖରେ ପହଞ୍ଚିଲେ ବେଗୁନିଆ ବିଧାୟକ ରାଜେନ୍ଦ୍ର କୁମାର ସାହୁ । ଗାନ୍ଧୀ ଜୟନ୍ତୀ ଠାରୁ ବିଜେଡି ଆରମ୍ଭ କରିଥିବା ଜନସଚେତନତା ଅଭିଯାନରେ ସେ ସାମିଲ ହୋଇ ଲୋକଙ୍କୁ ସରକାରଙ୍କ ବିଭିନ୍ନ ଯୋଜନା ବିଷୟରେ ବୁଝାଇଛନ୍ତି । ଏହାସହ ଅନେକ କାର୍ଯ୍ୟାଦେଶ ବଣ୍ଟନ କରିଛନ୍ତି ।
ଏହି ଅବସରରେ ବିଧାୟକ ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ ସିମର ଗ୍ରାମପଞ୍ଚାୟତ ପରିସରରେ ଥିବା ଗାନ୍ଧୀଙ୍କ ପ୍ରତିମୂର୍ତ୍ତି, ମିଶନ ଶକ୍ତି ଗୃହ ଓ ପଞ୍ଚାୟତ ଘର ଉଦଘାଟନ କରିଛନ୍ତି । ସେହିପରି ଲୋକଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ କାର୍ଯ୍ୟାଦେଶ ବଣ୍ଟନ, ଭତ୍ତା ବଣ୍ଟନ ଓ ହରିଶ୍ଚନ୍ଦ୍ର ଯୋଜନାରେ ଅର୍ଥ ପ୍ରଦାନ କରିଛନ୍ତି ।
ସୂଚନାଥାଉକି, ଗାନ୍ଧୀ ଜୟନ୍ତୀ ଠାରୁ ବିଜେଡି ମାସେ ବ୍ୟାପୀ ଜନସଚେତନତା ଅଭିଯାନ ଆରମ୍ଭ କରିଛି । ଯେଉଁ ଅଭିଯାନରେ ବିଧାୟକମାନେ ସେମାନଙ୍କ ଅଞ୍ଚଳକୁ ଯାଇ ଲୋକଙ୍କୁ ସରକାରଙ୍କ କାର୍ଯ୍ୟ ଉପରେ ଅବଗତ କରିବେ । ଏହାସହ କୋଭିଡ୍ ସମୟରେ ସରକାର କଣ ସବୁ ପଦକ୍ଷେପ ନେଇଛନ୍ତି ତାକୁ ବୁଝାଇବେ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
