ଭୁବନେଶ୍ବର: ରାଜ୍ୟର ଆନ୍ତର୍ଜାତୀୟ ବିଜୁ ପଟ୍ଟନାୟକ ବିମାନବନ୍ଦରରେ ଶତ ପ୍ରତିଶତ ସୌରଶକ୍ତି ବ୍ୟବହାର ହୋଇଛି । ବିଦ୍ୟୁତ ଶକ୍ତି ପରିବର୍ତ୍ତେ ସବୁଜ ଶକ୍ତିର ଉପଯୋଗ କରି ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ଏକ ନୂଆ କୀର୍ତ୍ତିମାନ ସ୍ଥାପନ କରିଛି । ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନ ବନ୍ଦର ପରିସରରେ ୧୮.୭୫ କୋଟି ଟଙ୍କା ବ୍ୟୟରେ ୪ ମେଗାୱାଟର ସୌର ପ୍ରକଳ୍ପ ସ୍ଥାପନ କରାଯାଇଛି ।
ଏହି ସୌର ଶକ୍ତିରୁ ବିମାନବନ୍ଦରରେ ଦୈନିକ ବ୍ୟବହାରରେ କାର୍ଯ୍ୟ କରୁଛି । ୨୦୨୩ ଏପ୍ରିଲ ମାସ ମଧ୍ୟରେ ସୌର ପ୍ରକଳ୍ପରୁ ସମୁଦାୟ ୯୩୫୯୬୩ କିଲୋୱାଟ ଶକ୍ତି ହସ୍ତଗତ ହୋଇଥିଲା । ସେହିପରି ଗ୍ରୀଡ୍ରୁ ୨୭୧୯୦୪୬ (୩୫%) କିଲୋୱାଟ ବିଦ୍ୟୁତ୍ କ୍ରୟ କରାଯାଇଥିଲା । ତେବେ ଚଳିତ ମାସ ସୁଦ୍ଧା ବିମାନବନ୍ଦରର ନିଜ ବ୍ୟବହାର ପାଇଁ ଶତ ପ୍ରତିଶତ ବିଦ୍ୟୁତ ଚାହିଦା ଅକ୍ଷୟ ଶକ୍ତିରୁ ପୂରଣ ହୋଇପାରିଛି । ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ସର୍ବ ପ୍ରଥମେ ୨୦୧୩ ମସିହାରେ ସୌର ପ୍ରକଳ୍ପର କାର୍ଯ୍ୟକାରି ହୋଇଥିଲା । ୨୦୧୩ ଅଗଷ୍ଟ ମାସ ସୁଦ୍ଧା ଛାତ ଉପରେ ବସିଥିବା ସୌର ପ୍ରକଳ୍ପରୁ ୧୦୦ କିଲୋୱାଟର ଶକ୍ତି ଉତ୍ପାଦନ ଆରମ୍ଭ କରାଯାଇଥିଲା।
ପର୍ଯ୍ୟାୟ କ୍ରମେ ଶକ୍ତି ଉତ୍ପାଦନ ପରିମାଣ ୪.୧ ମେଗାୱାଟରେ ପହଞ୍ଚିପାରିଛି । ତେବେ ଅଙ୍ଗାରକାମ୍ଳର ହ୍ରାସ ପାଇଁ ନିଆଯାଇ ଥିବା ପଦକ୍ଷେପ ପାଇଁ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରକୁ ୨୦୨୦ ଜାନୁଆରୀ ୭ ତାରିଖରେ ଲେବୁଲ୍-୨ କାର୍ବନ ନିର୍ଗମନ ହ୍ରାସ ପ୍ରମାଣପତ୍ର ମିଳିଥିଲା । ବର୍ତ୍ତମାନ ଲେବୁଲ୍-୩ ପ୍ରମାଣପତ୍ର ହାସଲ କରିପାରିଛି । ଶୂନ କାର୍ବନ ନିର୍ଗମନ ଲକ୍ଷ୍ୟରେ ବିମାନବନ୍ଦରରେ ଶତ ପ୍ରତିଶତ ସବୁଜ ଶକ୍ତିର ବ୍ୟବହାର ହୋଇଛି ।
ଏହା ବି ପଢନ୍ତୁ...ଉଦଯାପିତ ହେଲା ଦୁଇ ଦିନିଆ ଲୋକ ମହୋତ୍ସବ
ସୂଚନାଯୋଗ୍ୟ, ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ଆନ୍ତର୍ଜାତୀୟ ଟର୍ମିନାଲର ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ସେହିପରି ନିଜର ସର୍ବ ବୃହତ ଏୟାର ଟ୍ରାଫିକ୍ କଣ୍ଟ୍ରୋଲ ଟାୱାର (ATR) ଖୁବ ଶୀଘ୍ର କାର୍ଯ୍ୟକ୍ଷମ କରିବ । ଏପଟେ ଭୁବନେଶ୍ଵର ବିମାନ ବନ୍ଦରରୁ ଖୁବ ଶୀଘ୍ର ଦୁବାଇ ସହ ବ୍ୟାଙ୍କକ ଓ ସିଙ୍ଗାପୁରକୁ ବିମାନ ଉଡିବ। ତେବେ ମେ ୧୫ ତାରିଖରୁ ଭୁବନେଶ୍ବରରୁ ଦୁବାଇକୁ ସିଧା ବିମାନ ଉଡାଣ କରୁଥିବା ବେଳେ ଜୁନ୍ ୩ ତାରିଖରୁ ଭୁବନେଶ୍ବରରୁ ସିଙ୍ଗାପୁର ଓ ବ୍ୟାଙ୍କକ୍କୁ ବିମାନ ସେବା ଆରମ୍ଭ ହେବ । କୋରୋନା ପାଇଁ ୨ ବର୍ଷ ଧରି ଅନ୍ତର୍ଜାତୀୟ ବିମାନ ଚଳାଚଳ ବନ୍ଦ ରହିଥିଲା । ସିଙ୍ଗାପୁର ଓ ବ୍ୟାଙ୍କକ ଯିବା ପାଇଁ ୧୫,୦୦୦ ଏବଂ ଦୁବାଇ ପାଇଁ ୨୦,୦୦୦ ଟଙ୍କା ଟିକେଟ ଖର୍ଚ୍ଚ ଧାର୍ଯ୍ୟ କରାଯାଇଛି । ଏହା ଓଡିଶା ପାଇଁ ବେଶ ଲାଭଦାୟକ ହେବା ସହ ଶିଳ୍ପ, ବ୍ୟବସାୟ ଓ ଅନ୍ୟାନ୍ୟ ସୁବିଧା ଲୋକଙ୍କ ପାଖେ ବେଶ ସହଜରେ ପହଞ୍ଚି ପାରିବ ।
ଇଟିଭି ଭାରତ,ଭୁବନେଶ୍ବର
