ଖୋର୍ଦ୍ଧା: ସବୁବେଳେ କିଛି ନିଆରା କରିବାର ଇଚ୍ଛା ତାଙ୍କୁ ଚର୍ଚ୍ଚାରେ ରଖିଛି । ସେ ହେଉଛନ୍ତି ଖୋର୍ଦ୍ଧା ଜିଲା ଜଟଣୀ ଅଞ୍ଚଳର ଈଶ୍ୱର ରାଓ । ବିଭିନ୍ନ ସମୟରେ ଭିନ୍ନ ଭିନ୍ନ କଳାକୃତି କରି ସେ ଲିମକା ବୁକରେ ରେକର୍ଡ କରିସାରିଛନ୍ତି ।
ସବୁଥର ଭଳି ଦୀପାବଳି ପାଇଁ ସେ ବାଣ ବଦଳରେ ଆମ ସଂସ୍କୃତି ଓ ପରମ୍ପରାକୁ ବଞ୍ଚାଇ ରଖିବା ପାଇଁ ମାଟି ଦୀପ ଜାଳିବାର ବାର୍ତ୍ତା ଦେଇଛନ୍ତି ତାଙ୍କ କଳାକୃତି ମାଧ୍ୟମରେ ।
ଦୀପାବଳିରେ ପୁର ପଲ୍ଲୀ ଉତ୍ସବ ମୁଖରିତ ରହିଛି । କେଉଁଠି କ୍ୟାଣ୍ଡେଲ ତ ଆଉ କେଉଁଠି ଲିଚୁ ଲାଇଟରେ ଝଲସୁଛି ସହର । ଏପରି ସ୍ଥିତିରେ ସଂସ୍କୃତି ଓ ପରମ୍ପରାକୁ ବଞ୍ଚାଇ ରଖିବା ପାଇଁ ଈଶ୍ବର ବୋତଲ ଭିତରେ ତିଆରି କରିଛନ୍ତି ମାଟିର ଦୀପ । ଏହା ସହ ସେ ସମସ୍ତଙ୍କୁ ଦେଇଛନ୍ତି ମାଟି ଦୀପ ଜାଳିବାର ବାର୍ତ୍ତା ।
ଈଶ୍ବର ଦୀର୍ଘ ସାତ ଦିନ ପରିଶ୍ରମ କରି ଏକ କାଚ ବୋତଲ ମଧ୍ୟରେ ସାଢେ ତିନି ଇଞ୍ଚର ଦୀପ ଷ୍ଟାଣ୍ଡ କରି ଚର୍ଚ୍ଚାକୁ ଆସିଛନ୍ତି । ଏହା ସହ ସେ କରିଥିବା ବୋତଲ ଭିତରେ ଏହି ଦୀପ ଷ୍ଟାଣ୍ଡ ବିଶ୍ୱରେ ପ୍ରଥମ ବୋଲି ଦାବି କରିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
