ଖୋର୍ଦ୍ଧା: ଜିଲ୍ଲାର 16 ନମ୍ବର ଜାତୀୟ ରାଜପଥ ଚମ୍ପଗଡ ନିକଟରେ ଏକ ଏସିଡ ଟ୍ୟାଙ୍କରରୁ ଏସିଡ ଲିକ ହୋଇଛି । ଟ୍ୟାଙ୍କରଟି ଗଞ୍ଜାମରୁ କୋଲକାତା ଅଭିମୁଖେ ଯାଉଥିଲା । ତେବେ ଘଟଣାରେ କାହାରି କୌଣସି କ୍ଷତି ହୋଇନଥିବା ଜଣାପଡିଛି ।
ଜାତୀୟ ରାଜପଥ ଉପରେ ବିଷାକ୍ତ ଗ୍ୟାସ ଲିକ, ହୋଇନି କୌଣସି କ୍ଷୟକ୍ଷତି
ଗଞ୍ଜାମରୁ ଟ୍ୟାଙ୍କରଟି କୋଲକାତା ଅଭିମୁଖେ ଯାତ୍ରା କରୁଥିବାବେଳେ ଘଟିଛି ଏହି ଘଟଣା । ହାଇଡ୍ରୋକ୍ଲୋରିକ ଏସିଡ ଟ୍ୟାଙ୍କରର ଭଲବ କଟିଯିବାରୁ ଏସିଡ ଲିକ ହୋଇଥିବା ସୂଚନା ମିଳିଛି । ଘଟଣାରେ କାହାରି କୌଣସି କ୍ଷତି ହୋଇନାହିଁ । ଘଟଣାସ୍ଥଳରେ ଟାଙ୍ଗି ଓ ଖୋର୍ଦ୍ଧା ଅଗ୍ନିଶମ ବିଭାଗ ପକ୍ଷରୁ ଟ୍ୟାଙ୍କରରେ ପାଣି ପକାଇ ସ୍ଥିତିକୁ ନିୟନ୍ତ୍ରଣ କରିବାରେ ଲାଗିଛନ୍ତି ।
ଏସିଡ ଲିକ ଫଳରେ ଜାତୀୟ ରାଜପଥ ଧୂଆଁମୟ ହୋଇଯାଇଥିଲା । କିଛି ସମୟ ପାଇଁ ରାଜପଥରେ ଟ୍ରାଫିକ ସମସ୍ୟା ମଧ୍ୟ ଦେଖାଦେଇଥିଲା । ତେବେ ଅଗ୍ନିଶମବାହିନୀ ପହଞ୍ଚି ସ୍ଥିତିକୁ ନିୟନ୍ତ୍ରଣକୁ ଆଣିଥିବା ସୂଚନା ମିଳିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
