ଖୋର୍ଦ୍ଧା: ବୋଲଗଡ ଥାନା ବାଙ୍କୋଇ ଫାଣ୍ଡି ପୋଲିସ ରବିବାର ସ୍ଥାନୀୟ ଅଞ୍ଚଳର ପାଟପୁରଶାସନ ଖାରଡପଲ୍ଳୀ ଗ୍ରାମ ନିକଟ କାଜୁ ପଡିଆରେ ପଡିଥିବା ଜଣେ ଯୁବକଙ୍କ ମୃତଦେହକୁ ପୋଲିସ ଜବତ କରିଛି । ଉକ୍ତ ଯୁବକ ଜଣଙ୍କୁ ହତ୍ୟା କରାଯାଇଥିବା ପରିବାର ପକ୍ଷରୁ ଅଭିଯୋଗ ହେଇଛି ।
ଏହି ଘଟଣାରେ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହିତ ଦୁଇଜଣଙ୍କୁ ଅଟକ ରଖିଛି । ଘଟଣାରୁ ପ୍ରକାଶ ଯେ ମୃତ ଯୁବକ ଜଣକ ହେଉଛନ୍ତି ଖାରଡପଲ୍ଳୀ ଗ୍ରାମର ବୀରବର ବେହେରାଙ୍କ ପୁଅ ସତ୍ୟସୁନ୍ଦର ବେହେରା ।
ସତ୍ୟସୁନ୍ଦରଙ୍କ ମାଆଙ୍କ କହିବା ଅନୁସାରେ, ତାଙ୍କ ପୁଅ ସତ୍ୟ ଗତକାଲି ରାତିରୁ ଗ୍ରାମର ଦୁଇଜଣ ଯୁବକଙ୍କ ସହ ବୁଲିବାକୁ ଯାଈଥିଲା ବେଳେ ବିଳମ୍ବିତ ରାତି ପର୍ଯ୍ୟନ୍ତ ଘରକୁ ଫେରିନଥିଲେ । ଆଜି ସକାଳୁ ସତ୍ୟଙ୍କ ମୃତଦେହ ଗ୍ରାମଠାରୁ ଅଧକିଲୋମିଟର ଦୂରରେ ଥିବା ଏକ କାଜୁ ଜଙ୍ଗଲ ପଡିଆରେ ପଡିଥିବାର ଲୋକେ ଦେଖିଥିଲେ ।
ଖବରପାଇ ପରିବାର ଲୋକେ ସେଠାରେ ପହଞ୍ଚି ମୃତଦେହକୁ ଚିହ୍ନଟ କରିଥିଲେ । ପରେ ପୋଲିସ ଖବର ପାଇ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
