ପୁରୀ: ଜିଲ୍ଲାର ସାକ୍ଷୀଗୋପାଳ ମନ୍ଦିର ନିକଟରେ ଏକ ତୀର୍ଥଯାତ୍ରୀ ବସରେ ଲାଗିଲା ନିଆଁ । ସୌଭାଗ୍ୟ ବଶତଃ ବସରେ କେହି ନ ଥିବାରୁ ଏକ ବଡ ଅଘଟଣ ଟଳି ଯାଇଛି। ତେବେ ଏଭଳି ଘଟଣା ପୁରୀ ସାକ୍ଷୀଗୋପାଳ ମନ୍ଦିର ପଛପଟେ ଘଟିଛି । ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁ ଲିଭାଇଥିବା ସୂଚନା ମିଳିଛି ।
ସୂଚନା ଅନୁସାରେ, ମଧ୍ୟପ୍ରଦେଶରୁ କିଛି ପର୍ଯ୍ୟଟକ କରି ବସ୍ ଯୋଗେ ଚାରିଧାମ ଯାତ୍ରା ପାଇଁ ଆସିଥିବା ବେଳେ ସାକ୍ଷୀଗୋପାଳରେ ଏଭଳି ଅଘଟଣ ଘଟିଛି । ସେମାନେ ସାକ୍ଷୀଗୋପାଳ ମନ୍ଦିର ପଛପଟେ ରୋଷେଇ କରିବା ପାଇଁ ଗ୍ୟାସ୍ ଲଗାଇ ରୋଷେଇ କରୁଥିଲେ । ହେଲେ ଅସାବଧାନତା ଯୋଗୁଁ ଗ୍ୟାସ୍ ରୁ ନିଆଁ ଲାଗି ନିକଟରେ ଥିବା ବସରେ ଲାଗି ଯାଇଥିବା କୁହାଯାଉଛି । ତେବେ ବସରେ କେହି ଯାତ୍ରୀ ନ ଥିବାରୁ ଏକ ବଡ ଅଘଟଣ ଟଳିଯାଇଛି । ହେଲେ ପର୍ଯ୍ୟଟକଙ୍କର ବସରେ ଥିବା ଫୋନ, ନଗଦ ଟଙ୍କା, ପୋଷାକ ଓ ଅଳଙ୍କାର ସମେତ ସମସ୍ତ ଜିନିଷ ଜଳିପୋଡି ପାଉଁଶ ହୋଇଯାଇଛି । ତେବେ ମଧ୍ୟପ୍ରଦେଶରୁ ପ୍ରାୟ 40 ଜଣ ଯାତ୍ରୀ ଏହି ବସରେ ନେପାଳ ଏବଂ ଚିତ୍ରକୋଟରେ ଧାର୍ମିକ ଯାତ୍ରା ଶେଷ କରିବା ପରେ ଓଡିଶାରେ ପହଞ୍ଚିଥିଲେ ।
ବସ ଡ୍ରାଇଭରଙ୍କ କହିବାନୁସାରେ, "ମୁଁ ଶୋଇଥିବା ବେଳେ ଅନ୍ୟମାନେ ବସ ନିକଟରେ ରୋଷେଇ କରୁଥିଲେ । ହେଲେ ଅସାବଧାନତା ଯୋଗୁଁ ବସରେ ନିଆଁ ଲାଗିଯାଇଥଲା । ଯାହାଦ୍ବାରା ବସରେ ଥିବା ସମସ୍ତ ଗୁରୁତ୍ବପୂର୍ଣ୍ଣ ଜିନିଷ ପୋଡି ପାଉଁଶ ହୋଇଯାଇଛି ।"
ଇଟିଭି ଭାରତ, ପୁରୀ
