ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ତିନିଦିନିଆ କଳାହାଣ୍ଡି ଓ ନୂଆପଡା ଜିଲ୍ଲା ଗସ୍ତରେ ୫-ଟି ସଚିବ ଭି. କେ ପାଣ୍ଡିଆନ । ଗସ୍ତର ପ୍ରଥମ ଦିନରେ ଟିମ ଉତକେଲା, ମଦନପୁର ଓ ଭବାନୀପାଟଣା ଗସ୍ତରେ ଯାଇ ବିଭିନ୍ନ ବିକାଶ କାମ ବୁଲି ଦେଖିଛନ୍ତି । ଏହା ସହ ଛାତ୍ରଛାତ୍ରୀ, ମହିଳା, କ୍ରୀଡାବିତ ଓ ସ୍ଥାନୀୟ ଜନସାଧାରଣଙ୍କ ସହ ଟିମ ଆଲୋଚନା କରିଛି । ଟିମ ପ୍ରଥମେ ଉତକେଲା ବିମାନ ଘାଟିର ବିକାଶ କାମ ଅନୁଧ୍ୟାନ କରିଛନ୍ତି । କଳାହାଣ୍ଡିକୁ ବାୟୁ ସଂଯୋଗର ବିକାଶ ପାଇଁ ଉତକେଲା ବିମାନ ଘାଟି ରନୱେର ସମ୍ପ୍ରସାରଣ କାମ ଡିସେମ୍ବର 23 ସୁଦ୍ଧା ଶେଷ କରିବାକୁ ଟିମ ପରାମର୍ଶ ଦେଇଛି । ପରେ ଟିମ ବେଲଖଣ୍ଡିର ପ୍ରସିଦ୍ଧ ଉମା ମହେଶ୍ବର ଧବଳେଶ୍ଵର ଶିବ ମନ୍ଦିର ଯାଇ ପୂଜାର୍ଚ୍ଚନା କରିଛନ୍ତି । ମନ୍ଦିରର ବିକାଶ ସମ୍ପର୍କରେ ସେବାୟତ ଓ କମିଟି ସଭ୍ଯମାନଙ୍କ ସହ ଆଲୋଚନା କରିଛନ୍ତି । ମନ୍ଦିର ବିକାଶ ପାଇଁ 15 ଦିନ ଭିତରେ DPR ପ୍ରସ୍ତୁତି ପାଇଁ ଜିଲ୍ଲାପାଳଙ୍କୁ ଟିମ ପରାମର୍ଶ ଦେଇଛି ।
ମଦନପୁର ରାମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ରୂପାନ୍ତର କାମ ଟିମ ବୁଲି ଦେଖିଛି । ଏହା ସହ ଆମ ହସ୍ପିଟାଲ କାମ ଆଗାମୀ ଛ' ମାସ ମଧ୍ୟରେ ଶେଷ କରିବା ପାଇଁ ଟିମ ପରାମର୍ଶ ଦେଇଛି । ଏହି ଅବସରରେ ଟିମ ନିରାମୟ କେନ୍ଦ୍ରରେ ମାଗଣା ଔଷଧ ବଣ୍ଟନ କାମ ଅନୁଧ୍ୟାନ କରିଛି । ତେଲ ନଦୀ ଉପରେ ନିର୍ମାଣ ହେଉଥିବା ସନ୍ଦୁଲ ବ୍ୟାରେଜ କାମର ଅଗ୍ରଗତିର ଟିମ ସମୀକ୍ଷା କରିଛି । ଏହା ସହ କାମ ଶୀଘ୍ର ଶେଷ କରିବାକୁ ଟିମ ପରାମର୍ଶ ଦେଇଛି । ମାର୍ଚ୍ଚ 24 ସୁଦ୍ଧା କାମ ଶେଷ କରିବାକୁ ଲକ୍ଷ୍ୟ ଥିବା ବିଷୟ ବିଭାଗୀୟ କର୍ତ୍ତୁପକ୍ଷ ଟିମକୁ ଅବଗତ କରିଛନ୍ତି । ଏହି ବ୍ୟାରେଜ କାମ ଶେଷ ହେଲେ ନର୍ଲା, କର୍ଲାମୁଣ୍ଡା ଓ କେସିଙ୍ଗା ବ୍ଲକର 29 ଟି ଗାଁର ଚାଷ ଜମିକୁ ଅଣ୍ଡରଗ୍ରାଉଣ୍ଡ ପାଇପ ଦ୍ଵାରା ପାଣି ମିଳିପାରିବ ।
