କେନ୍ଦୁଝର: ଜିଲ୍ଲାର ତେଲକୋଇ ଥାନା ହାଲପୋଡି ଗାଁରେ ଘଟିଛି ଅଭାବନୀୟ ଘଟଣା । ବିଦ୍ୟୁତ ଆଘାତରେ ଜଣେ ଯୁବକଙ୍କ ଜୀବନ ଚାଲିଯାଇଥିବା ଜଣାପଡିଛି ।
ବିଦ୍ୟୁତ ଆଘାତରେ ଯୁବକ ମୃତ
ମୃତକ ହେଲେ ତେଲକୋଇ ଥାନା ଅନ୍ତର୍ଗତ ହାଲପୋଡି ଗାଁର ଗୋଲଖ ବିହାରୀ ସାହୁ । ସବୁଦିନ ଭଳି ଆଜି ପାଣିପମ୍ପରେ ବିଦ୍ୟୁତ ସଂଯୋଗ କରି କୂଅରୁ ପାଣି ଉଠାଉଥିବା ବେଳେ ଗୋଲଖଙ୍କୁ କରେଣ୍ଟ ଲାଗିଯାଇଥିଲା । ଯୁବକ ଜଣଙ୍କ କୂଅ ପାଖରେ ବେହୋସ ହୋଇ ପଡିଯାଇଥିଲେ । ଗୋଲଖ ସାହୁ କୂଅ ପାଖରେ ବେହୋସ ହୋଇ ପଡିଥିବା କିଛି ଲୋକ ଦେଖି ଘର ଲୋକଙ୍କୁ ଖବର ଦେଇଥିଲେ ।
ଏହାପରେ ପରିବାର ଲୋକେ ସଙ୍ଗେ ସଙ୍ଗେ ତାଙ୍କୁ ତେଲକୋଇ ମେଡିକାଲକୁ ଆଣିଥିଲେ । ଡାକ୍ତର ସେଠାରେ ଗୋଲଖଙ୍କୁ ମୃତ ଘୋଷଣା କରିଥିଲେ । ଏଭଳି ଅଭାବନୀୟ ଘଟଣାରେ ଅଞ୍ଚଳରେ ଶୋକର ଛାୟା ଖେଳିଯାଇଥିବା ଦେଖିବାକୁ ମିଳିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
