ଆନନ୍ଦପୁର: ଜିଲ୍ଲାରେ ଭାଲୁ ଆତଙ୍କ । କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଘସିପୁରା ବ୍ଲକ୍ ପୁରୁଣାବାନ୍ଦୋବଡା ଗାଁରେ ଆଜି ଭୋର ସମୟରେ ଭାଲୁ ଆକ୍ରମଣରେ ଗାଁର ୩ଜଣ ଆହତ ହୋଇଛନ୍ତି ।
ଶୌଚ ହେବାକୁ ବାହାରିଥିବା ସମୟରେ ୨ଜଣଙ୍କୁ ଭାଲୁ ଆକ୍ରମଣ କରିଥିବା ବେଳେ କ୍ଷୀର ବିକ୍ରି କରିବାକୁ ବାହାରିଥିବା ଜଣେ କ୍ଷୀର ବିକାଳି ଭାଲୁ ଆକ୍ରମଣର ଶିକାର ହୋଇଛନ୍ତି । ଆକ୍ରମଣରେ ଆହତ ହୋଇଥିବା ସମସ୍ତଙ୍କୁ ସାଇଁକୁଳ ଡାକ୍ତରଖାନାରେ ଭର୍ତ୍ତି କରାଯାଇଛି । ଏଥିସହ ଗତ ରାତିରେ ଗାଁର ଜଣଙ୍କ ଅଗଣାରେ ଥିବା ଏକ ବାଇକକୁ ମଧ୍ୟ ଭଙ୍ଗାରୁଜା କରିଛି ଭାଲୁ ।
ଗତକାଲିଠାରୁ ଗାଁରେ ଉତ୍ପାତ ମଚାଇଛି ଭାଲୁ । ଗାଁକୁ ପଶିବାକୁ ଉଦ୍ଯମ କରୁଥିବା ସମୟରେ ବନବିଭାଗ କର୍ମଚାରୀମାନେ ତାକୁ ଘଉଡାଇବାକୁ ଉଦ୍ୟମ କରିବାବେଳେ ଜଣେ ବନବିଭାଗ ଗାର୍ଡଙ୍କ ବାଇକକୁ ଜଙ୍ଗଲ ଭିରତରକୁ ଟାଣି ନେଇଥିଲା ଭାଲୁ । ତେବେ ଆଜିର ଏହି ଘଟଣାପରେ ବନବିଭାଗ କର୍ମଚାରୀମାନେ ଜାଲ ବିଛାଇ ଭାଲୁକୁ କାବୁ କରିବାରୁ ଗାଁ ଲୋକେ ଆଶ୍ୱସ୍ତି ଲାଭ କରିଛନ୍ତି ।
ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ,ଇଟିଭି ଭାରତ
