କେନ୍ଦୁଝର: ଉତ୍ତର ଓଡିଶା ବିଶ୍ୱବିଦ୍ୟାଳୟର 2ୟ କ୍ୟାମ୍ପସ ଭାବେ କେନ୍ଦୁଝରର ସହରରେ ଏକ ବ୍ରାଞ୍ଚ ସରକାର ଗଠନ କଲେ । ଏଠାରେ ପିଜିରୁ ଊର୍ଦ୍ଧ୍ବ ପାଠ୍ୟକ୍ରମ ଖୋଲାଗଲା । ଏଥିପାଇଁ ବିଶ୍ୱବିଦ୍ୟାଳୟ ପକ୍ଷରୁ ପ୍ରଥମେ ଭଡାଘରେ ଏବଂ ପରେ ନିଜସ୍ୱ ନୂତନ ବିଲ୍ଡିଂରେ ପାଠ୍ୟକ୍ରମ ଆରମ୍ଭ ହେଲା । କିନ୍ତୁ ପାଠ୍ୟକ୍ରମ ଆରମ୍ଭ ଦିନଠାରୁ କ୍ୟାମ୍ପସରେ ଯେଉଁ ସୁବିଧା ସୁଯୋଗ ମିଳିବା କଥା ଏପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ମିଳିପାରୁନଥିବା ଅଭିଯୋଗ ହେଉଛି ।
ଏନେଇ ଛାତ୍ରଛାତ୍ରୀମାନେ 2ୟ କ୍ୟାମ୍ପସକୁ ବନ୍ଦ କରିବାକୁ ବାରମ୍ବାର ଦାବିପତ୍ର ପ୍ରଦାନ କରିଥିଲେ ମଧ୍ୟ କିଛି ସୁଫଳ ମିଳିନଥିବା ଛାତ୍ରଛାତ୍ରୀମାନେ ଅଭିଯୋଗ କରିଛନ୍ତି । ଶୁକ୍ରବାର ଦିନ ଏହି ଅଭିଯୋଗ ଆଧାରରେ ବିଶ୍ୱବିଦ୍ୟାଳୟର ରେଜିଷ୍ଟାର କ୍ୟାମ୍ପସ ପରିଦର୍ଶନରେ ଆସିଥିବା ବେଳେ ଛାତ୍ରଛାତ୍ରୀମାନେ କ୍ୟାମ୍ପସ ଗେଟରେ ତାଲା ପକାଇ ତାଙ୍କୁ ଘେରିଥିଲେ । କ୍ୟାମ୍ପସର ସାମାନ୍ୟ ମୌଳିକ ସୁବିଧା ଯୋଗାଇ ଦେବା ପାଇଁ ଦାବିକରିଥିଲେ ।
ରେଜିଷ୍ଟାର କ୍ୟାମ୍ପସର ରାସ୍ତା, ପିଇବାପାଣି, ଲାବ୍ରୋଟାରି ଆଦି ପ୍ରାଥମିକ ସୁବିଧା ଶୀଘ୍ର ଯୋଗାଇ ଦେବେ ବୋଲି ପ୍ରତିଶୃତି ଦେବାରୁ ଆନ୍ଦୋଳନ ପ୍ରତ୍ୟାହୃତ ହୋଇଥିଲା ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
