କେନ୍ଦୁଝର: ଦୁଇ ଦିନିଆ କେନ୍ଦୁଝର ଗସ୍ତରେ ଅଛନ୍ତି ବିଜେପି ରାଜ୍ୟ ସାଧାରଣ ସମ୍ପାଦକ ଗୋଲକ ମହାପାତ୍ର । ପ୍ରଥମ ଦିନ ଜିଲ୍ଲାର ସମସ୍ତ ପଦାଧିକାରୀଙ୍କ ସହ ବୈଠକ ପରେ ବିଭିନ୍ନ ଅଞ୍ଚଳ ପରିଦର୍ଶନ କରିଥିଲେ । ଆଜି(ଶୁକ୍ରବାର) ଏହି ଅଞ୍ଚଳ ପରିଦର୍ଶନ ପରେ ସ୍ଥାନୀୟ ଜିଲ୍ଲା କାର୍ଯ୍ୟାଳୟ ପରିସରରେ ଏକ ସାମ୍ବାଦିକ ସମ୍ମିଳନୀରେ ଯୋଗ ଦେଇଥିଲେ ଗୋଲକ ମହାପାତ୍ର । ଜିଲ୍ଲାରେ ମରୁଡି ସମସ୍ୟା ସୃଷ୍ଟି ହେବାକୁ ଯାଉଥିବା ବେଳେ ରାଜ୍ୟ ସରକାର ଜିଲ୍ଲାରେ ଜଳସେଚନର ବିକାଶ ପାଇଁ କିଛି କରିନଥିବା ନେଇ ବର୍ଷିଥିଲେ । ପାନୀୟ ଜଳ ଯୋଗାଣରେ ଅନିୟମିତତା ହୋଇଥିବା ବେଳେ ଡିଏମଏଫ ପାଣ୍ଠିର ଉପଯୋଗ ନେଇ ପ୍ରଶ୍ନ ଉଠାଇଥିଲେ ଗୋଲକ ।
ଡିଏମଏଫ ପାଣ୍ଠିର ଦୁରୂପଯୋଗ ହେଉଥିବା ବେଳେ ବୈଠକରେ ଠିକ ଭାବେ ଆଲୋଚନା ହେଉନଥିବା ନେଇ ପ୍ରଶ୍ନ ଉଠାଇଥିଲେ । ଏହାସହ ପ୍ରଧାନମନ୍ତ୍ରୀ ଆବାସ ଯୋଜନା, ରାସ୍ତା ଦୁର୍ନୀତି ଆଦିରେ ବିଜୁ ଜନତା ଦଳର ନେତା ସାମିଲ ଥିବା ବେଳେ ସେମାନଙ୍କୁ ପ୍ରଶାସନ ପକ୍ଷରୁ ଘଣ୍ଟ ଘୋଡ଼ା ଯାଉଥିବା ଅଭିଯୋଗ କରିଥିଲେ ଗୋଲକ ମହାପାତ୍ର । ଜିଲ୍ଲାରେ ଭିତ୍ତିଭୂମି ଥାଇ ବୃହତ ଇସ୍ପାତ ପ୍ରକଳ୍ପ କରୁନଥିବା ବେଳେ ଶିକ୍ଷାର ବିକାଶ କ୍ଷେତ୍ରରେ ରାଜ୍ୟ ସରକାର ଜାଣିଶୁଣି ଅବହେଳା କରୁଥିବା ନେଇ ବର୍ଷିଥିଲେ । ଆଗାମୀ ଦିନରେ ଏନେଇ ବିଜେପି ପକ୍ଷରୁ ଆନ୍ଦୋଳନକୁ ଜୋରଦାର କରାଯିବ ବୋଲି ଚେତାବନୀ ଦେଇଥିଲେ ରାଜ୍ୟ ସାଧାରଣ ସମ୍ପାଦକ ଗୋଲକ ମହାପାତ୍ର ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
