କେନ୍ଦୁଝର: ସମାଜ ଯେତେ ଆଗକୁ ବଢିଲେ ମଧ୍ୟ କିଛି ଲୋକଙ୍କ ଚିନ୍ତାଧାରା ଆଜିବି ପଛରେ ରହିଯାଇଛି । ତେଣୁ ଅନ୍ଧବିଶ୍ବାସ ଭଳି ପ୍ରଥାକୁ କିଛି ଲୋକ ଆଜିବି ମାନୁଛନ୍ତି । ଏଭଳି ଏକ ଦୃଶ୍ୟ ଦେଖିବାକୁ ମିଳିଛି କେନ୍ଦୁଝରର ସଦର ଥାନା ଅନ୍ତର୍ଗତ ମହାଦେଇଯୋଡ଼ା ଗ୍ରାମରେ ।
ଶନିବାର ଉପରୋକ୍ତ ଗ୍ରାମରେ ମଙ୍ଗୁଲୁ ମୁଣ୍ଡା ନାମକ ଜଣେ ବୃଦ୍ଧଙ୍କର ସାପ କାମୁଡ଼ାରେ ମୃତ୍ୟୁ ହୋଇଥିବା ଜଣାପଡିବା ପରେ ତାଙ୍କୁ ବଞ୍ଚାଇବା ପାଇଁ ପରିବାର ଲୋକଙ୍କ ପକ୍ଷରୁ ଗୁଣି ଗାରେଡି କରାଯାଇଥିବା ଜଣାପଡ଼ିଛି ।
ସୂଚନା ମୂତାବକ, ମଙ୍ଗୁଲୁ ଘର ବାହାରେ ଶୋଇଥିବାବେଳେ ତାଙ୍କୁ ଏକ ବିଷଧର ସାପ କାମୁଡିଥିଲା । ତେବେ ଏହାପରେ ପରିବାର ଲୋକ ତାଙ୍କୁ ଉଠାଇବା ପାଇଁ ଚେଷ୍ଟା କରି ବିଫଳ ହେବାପରେ ମଙ୍ଗୁଲୁ ମରିଯାଇଥିବା ନେଇ ସେମାନେ ସନ୍ଦେହ କରିଥିଲେ ।
ଏହାପରେ ସେମାନେ ତାଙ୍କୁ ବଞ୍ଚାଇବାକୁ ଯାଇ ଗୁଣି ଗାରେଡିରେ କିଛି ଫଳ ନ ମିଳିବାରୁ ଶନିବାର କେନ୍ଦୁଝର ମୁଖ୍ୟ ଚିକିତ୍ସାଳୟକୁ ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରି ବ୍ୟବଚ୍ଛେଦ ପାଇଁ ପଠେଇଦେଇଥିବା ଜଣାପଡିଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
