କେନ୍ଦୁଝର: ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା କ୍ରମାଗତ ବୃଦ୍ଧି ପାଉଛି । ଏହା ମଧ୍ୟରେ ରାଜ୍ୟ ସରକାରଙ୍କ ପକ୍ଷରୁ ଲାଗୁ ହୋଇଥିବା କୋରୋନା କଟକଣାକୁ ନେଇ ଓଡିଆ ପର୍ବ ରଜ ଫିକା ପଡିଛି । ଏପଟେ କେନ୍ଦୁଝର ଜିଲ୍ଲା ତେଲକୋଇ ବ୍ଲକ ଅନ୍ତର୍ଗତ କରମଙ୍ଗୀ ପଞ୍ଚାୟତର ସରପଞ୍ଚ ରଞ୍ଜିତା ନାୟକ ଟିଏମସିର କ୍ବାରେଣ୍ଟାଇନ ସେଣ୍ଟରରେ ଥିବା ଗ୍ରାମବାସୀଙ୍କୁ ପିଠା ବାଣ୍ଟିଛନ୍ତି ।
ସୂଚନା ଅନୁଯାୟୀ, କୋରୋନା ସଂକ୍ରମଣ ଭୟକୁ ଦୃଷ୍ଟିରେ ରଖି ଏଥର ରଜ ପାଳନରେ ବହୁ କଟକଣା ଲାଗୁ ହୋଇଛି । ସମସ୍ତ ଲୋକଙ୍କୁ ଏକତ୍ରିତ ନହୋଇ ଏବଂ କୋରୋନା ନିୟମ ପାଳନ କରି ରଜ ପାଳନ କରିବାକୁ ନିର୍ଦ୍ଦେଶ ଦିଆଯାଇଛି । ଏହା ମଧ୍ୟରେ କିଛି ଲୋକ ବାହାର ରାଜ୍ୟରୁ ଫେରି କ୍ବାରେଣ୍ଟାଇନ ସେଣ୍ଟରରେ ରହିଛନ୍ତି । ଫଳରେ ସେମାନେ ରଜ ପର୍ବରେ ସାମିଲ ହେବାରୁ ବଞ୍ଚିତ ରହିଛନ୍ତି ।
ତେଣୁ ସରପଞ୍ଚ ନାୟକ ନିଜଘରୁ ବିଭିନ୍ନ ପ୍ରକାର ପିଠା କରି ଗ୍ରାମବାସୀଙ୍କୁ ବାଣ୍ଟିଛନ୍ତି । ରଜରେ ଘରକୁ ନଯାଇ ପାରିଥିଲେ ମଧ୍ୟ ଘରୋଇ ପିଠା ଖାଇ ଖୁସି ବ୍ୟକ୍ତ କରିଛନ୍ତି ଗ୍ରାମବାସୀ । ସରପଞ୍ଚ ଏତାଦୃଶ କାର୍ଯ୍ୟକୁ ନେଇ ଗ୍ରାମବାସୀ ସାଧୁବାଦ ଜଣାଇଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
