କେନ୍ଦୁଝର: ରାଜ୍ୟ ବିଜେପି ପକ୍ଷରୁ ଚାଷୀଙ୍କ ସମସ୍ୟା ନେଇ ବିଭିନ୍ନ ଜିଲ୍ଲାରେ ପ୍ରତିବାଦ କରାଯାଉଛି । ଏହି କ୍ରମରେ ଆଜି ବିଜେପି ରାଜ୍ୟ କୃଷକ ମୋର୍ଚ୍ଚା ଉପସଭାପତି ରାଧାକାନ୍ତ ମହାନ୍ତଙ୍କ ନେତୃତ୍ବରେ ୪୯ ନମ୍ବର ରାଜରାସ୍ତାକୁ ରୋକ କରାଯାଇଥିଲା।
ସାର ରେକ ପଏଣ୍ଟ ଦାବିରେ ରାସ୍ତାରୋକ
ତୁରୁମୁଙ୍ଗା ଥାନା ଅନ୍ତର୍ଗତ ବାଉଁସୁଳି ରାଜରାସ୍ତାକୁ ଅବରୋଧ କରିଥିଲେ ବିଜେପି ନେତା । ଧାନ ମଣ୍ଡିରେ ବ୍ୟାପକ ଅବ୍ୟବସ୍ଥା ଜାରି ରହିଛି । କିନ୍ତୁ ସମବାୟ ବିଭାଗ ଓ ଯୋଗାଣ ବିଭାଗ ସମସ୍ୟାର ସମାଧାନ କରୁନାହାନ୍ତି ବୋଲି ବିଜେପି ଅଭିଯୋଗ କରିଛି ।
ସାର ଠାରୁ କୀଟନାଶକ ପର୍ଯ୍ୟନ୍ତ କିଛିବି ଚାଷୀଙ୍କ ପାଖରେ ପହଞ୍ଚୁନି । ଟୋକନ ବ୍ୟବସ୍ଥାକୁ ନେଇ ଅନେକ ଅଭିଯୋଗ ମଧ୍ୟ ଆସୁଛି । ଏହା ସହ କେନ୍ଦୁଝର ଜିଲ୍ଲାରେ ସାର ରେକ ପଏଣ୍ଟ ମଧ୍ୟ ଦାବି କରିଛି କୃଷକ ମୋର୍ଚ୍ଚା । ତେବେ ଜାତୀୟ ରାଜପଥ ଅବରୋଧ ଯୋଗୁଁ ଶହ ଶହ ଟ୍ରକ ରାସ୍ତା ଉପରେ ତିନି ଘଣ୍ଟାରୁ ଊର୍ଦ୍ଧ୍ବ ସମୟ ଛିଡ଼ା ହୋଇ ରହିଥିବା ଦେଖିବାକୁ ମିଳିଥିଲା ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
