କେନ୍ଦୁଝର: 'ଗଙ୍ଗାମାତା ଆର୍ଶୀବାଦ ଦେଲେ । ତେଣୁ ମୁଁ ମୋ ଗାଁ ଲୋକଙ୍କ ସହଯୋଗରେ ପାହାଡ଼ ଖୋଳି ଗାଁକୁ ପାଣି ଆଣି ପାରିଲି । ଗାଁକୁ ଶସ୍ୟଶ୍ୟାମଳା କରିପାରିଲି । ଏହି ପ୍ରୟାସ ପାଇଁ ଦିନେ ରାଷ୍ଟ୍ରପତି ଭବନ ଦେଖିବି ବୋଲି ଆଶା କରିନଥିଲି' । ପଦ୍ମଶ୍ରୀ ସମ୍ମାନରେ ସମ୍ମାନିତ ହେବା ପରେ ଏପରି କିଛି କହି ଭାବବିହ୍ବଳ ହୋଇପଡିଛନ୍ତି ୱାଟର ମ୍ୟାନ ଭାବେ ପରିଚିତ କେନ୍ଦୁଝରର ଦୈତାରୀ ନାୟକ ।
ଇଚ୍ଛା ଶକ୍ତି ଥିଲେ ସବୁ କିଛି ହାରମାନେ । ଅସମ୍ଭବ ବି ସମ୍ଭବ ହୋଇଯାଏ । ଯାହା ପ୍ରମାଣ କରାଇ ଦେଖାଇଥିଲେ କେନ୍ଦୁଝରର ୱାଟର ମ୍ୟାନ ଦୈତାରୀ ନାଏକ । ସେ ପାହାଡ କାଟି ଗାଁକୁ ଆଣିଥିଲେ ପାଣି । ଯାହା ତାଙ୍କୁ ୱାଟର ମ୍ୟାନର ପରିଚୟ ଦେଇଛି । ତାଙ୍କର ଏହି ପ୍ରୟାସ ଯୋଗୁଁ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଛି । । ସେ କେବେ ନିଜକୁ ଏହି ସ୍ଥିତିରେ ଦେଖିବେ ବୋଲି ଆଶା କରି ନ ଥିଲେ ବୋଲି କହିଛନ୍ତି ଦୈତାରୀ । କେନ୍ଦୁଝରିଆ ଭାବେ ଏହି ସମ୍ମାନ ପାଇଥିବାରୁ ଗର୍ବ ଅନୁଭବ କରୁଥିବା ମଧ୍ୟ କହିଛନ୍ତି ।
ଦୈତାରୀ ନାଏକ ପଦ୍ମଶ୍ରୀ ପାଇବା ପରେ ଜିଲ୍ଲାର ବିଭିନ୍ନ ମହଲରୁ ତାଙ୍କୁ ଶୁଭେଚ୍ଛାର ସୁଅ ଛୁଟୁଛି । ଦୈତାରୀ ନାଏକଙ୍କୁ ଏହି ସମ୍ମାନ ଆଗାମୀ ଦିନରେ ଗ୍ରାମ ଗୁଡିକରେ ସାଧାରଣ ଲୋକଙ୍କ ମଧ୍ୟରେ ସ୍ବେଚ୍ଛାସେବୀ ମନୋଭାଵକୁ ବୃଦ୍ଧି କରିବା ସହ କୃଷି ଭିତ୍ତିକ କାର୍ଯ୍ୟ ପାଇଁ ପ୍ରେରଣା ଦେବ ବୋଲି କହିଛନ୍ତି ବରିଷ୍ଠ ନାଗରିକ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
