କେନ୍ଦୁଝର: ଚମ୍ପୁଆ ବସାସାହି ଜଙ୍ଗଲରେ ଅଘଟଣ । ମହୁମାଛି ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ହୋଇଥିବାବେଳେ ୩ ଜଣ ଗୁରୁତର ଆହତ ହୋଇଛନ୍ତି । ମୃତକ ହେଉଛନ୍ତି ଯୋଡ଼ା ବ୍ଲକ୍ ତିତିରବିଲ୍ ଗାଁର ୫୦ ବର୍ଷିୟା ମହିଳା ବାସୁମତୀ ସର୍ଦ୍ଦାର । ମହୁମାଛି ଆକ୍ରମଣରେ ଗୁରୁତର ହୋଇଥିବା ଅନ୍ୟ ୩ ମହିଳା ସାବିତ୍ରୀ ସର୍ଦ୍ଧାର, ଚାନ୍ଦୁ ମୁଣ୍ଡା ଓ ସିନି ମୁଣ୍ଡାଙ୍କୁ ଉଦ୍ଧାର କରାଯାଇ ଚମ୍ପୁଆ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ, କେନ୍ଦୁଝର ଜିଲ୍ଲା ଯୋଡ଼ା ବ୍ଲକ୍ ତିତିରବିଲ୍ ଗାଁର ଏହି ୪ଜଣ ମହିଳା ସକାଳୁ ଝାଡୁ ପାଇଁ ଆବଶ୍ୟକ ଝାଟି କାଟିବା ପାଇଁ ଚମ୍ପୁଆ ନିକଟସ୍ଥ ବସାସାହି ଜଙ୍ଗଲକୁ ଯାଇଥିଲେ । ଜଙ୍ଗଲ ଭିତରେ ଝାଟି କାଟୁଥିବାବେଳେ ହଠାତ୍ ମହୁମାଛି ସେମାନଙ୍କୁ ଆକ୍ରମଣ କରିଥିଲା ।
ମହୁମାଛି ଆକ୍ରମଣରୁ ନିଜକୁ ରକ୍ଷା କରିବା ପାଇଁ ୩ ଜଣ ଦୂରକୁ ଧାଇଁ ପଳାଇ ଯିବାରେ ସକ୍ଷମ ହୋଇଥିଲେ ହେଁ ବାସୁମତୀ ଦୌଡ଼ି ପଳାଇ ଯିବାକୁ ସକ୍ଷମ ହୋଇପାରି ନଥିଲେ । ଫଳରେ ତାଙ୍କର ମୃତ୍ୟୁ ଘଟିଛି । ପରେ ନିକଟସ୍ଥ ଗ୍ରାମବାସୀ ୩ ଗୁରୁତର ମହିଳାଙ୍କୁ ଉଦ୍ଧାର କରି ଡାକ୍ତରଖାନାକୁ ପଠାଇଥିଲେ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
