କେନ୍ଦୁଝର: ସ୍ଥାନୀୟ ଯୋଡ଼ା ବ୍ଲକ ଅନ୍ତର୍ଗତ ବ୍ରାହ୍ମଣୀ ରିଭର ପ୍ୟାଲେଟ ଲିମିଟେଡ୍ (ବିଆର୍ପିଏଲ୍) କମ୍ପାନୀର ପାଇପ୍ ଲାଇନ୍ ଫାଟିବାରୁ ଲୋକଙ୍କ ଘରେ ବହଳ କାଦୁଅ ପାଣି ପଶିଥିବା ଦେଖାଯାଇଛି । ଶନିବାର ଯୋଡ଼ା ପୌରାଞ୍ଚଳ ଅଧିନସ୍ଥ ଚେମରୀ କ୍ୟାମ୍ପ୍ ନିକଟ ଦେଇ ଯାଇଥିବା ପାଇପ୍ ଲାଇନ୍ ଫାଟିବା ଫଳରେ ଏଭଳି ପରିସ୍ଥିତି ଉପୁଜିଥିଲା । ଏଥିରେ ବ୍ୟାପକ ପରିମାଣର ଫାଇନ୍ସ (ଲୁହା ପଥର ଗୁଣ୍ଡ) ମିଶ୍ରିତ କାଦୁଅ ପାଣି ବସ୍ତି ବାସିନ୍ଦାଙ୍କ ଘରେ ପଶି ଯାଇଥିବା ଦେଖାଯାଇଥିଲା ।
ତେବେ ବସ୍ତିର ପ୍ରାୟ 10ରୁ ଉର୍ଦ୍ଧ୍ବ ଜଣଙ୍କ ଘରେ ଏହି ଫାଇନାନ୍ସ ମିଶ୍ରିତ କାଦୁଅ ପାଣି ପଶିବା ଯୋଗୁଁ ଲୋକଙ୍କ ଆସବାବପତ୍ର ନଷ୍ଟ ହୋଇଛି । ଏନେଇ ବସ୍ତି ବାସିନ୍ଦା କ୍ଷତିପୂରଣ ପାଇଁ କମ୍ପାନୀ ନିକଟରେ ଦାବି କରିଛନ୍ତି । ସେପଟେ କମ୍ପାନୀ ଅଧିକାରୀ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିବା ପରେ ମରାମତି କାମ ଆରମ୍ଭ କରିଛନ୍ତି । ଆଗରୁ ମଧ୍ୟ ଥରେ ଏହିପରି ପାଇପ୍ ଲାଇନ୍ ଫାଟି ହନୁମାନ ହଟିଂରେ 17 ଜଣଙ୍କ ଘରେ କାଦୁଅ ପାଣି ପଶିଯାଇଥିଲା ।
ବିଆର୍ପିଏଲ୍ କମ୍ପାନୀ ଦ୍ବାରା ଏହି ପାଇପ୍ ଲାଇନ୍ ଯୋଗେ ବଡ଼ବିଲ ଟଣ୍ଟୋଠାରୁ ଫାଇନ୍ସ ବା ଲୁହାପଥର ଗୁଣ୍ଡ ଯାଜପୁର କଳିଙ୍ଗ ନଗରସ୍ଥିତ ପ୍ୟାଲେଟ ପ୍ଲାଣ୍ଟକୁ ନିଆଯାଇଥାଏ । ତେବେ କେଉଁ କାରଣରୁ ପାଇପ୍ ଲାଇନ୍ ଫାଟିଲା ତାହା ସ୍ପଷ୍ଟ ହୋଇନଥିଲେ ମଧ୍ୟ ନିୟମିତ ଯାଞ୍ଚ କରାଯାଉ ନଥିବାରୁ ଏପରି ଘଟିଥିବା ଅଭିଯୋଗ ହୋଇଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
