କେନ୍ଦୁଝର: ପୌରପାଳିକା ଅଧିକାରୀଙ୍କ ଘର ଆଗରେ ଅଳିଆ ଢାଳିଲେ ଲୋକେ । ଯାହାକୁ ନେଇ କେନ୍ଦୁଝର ଜିଲ୍ଲା ଯୋଡ଼ା ପୌରପାଳିକାରେ ଉତ୍ତେଜନା ଦେଖା ଦେଇଛି । ପୌରପାଳିକାର ୭ ନଂ ୱାର୍ଡରେ ମାଛ ଦୋକାନକୁ ପରିବା ବଜାର ଅଛି । ଏହି ଦୋକାନ ଗୁଡିକର ଆବର୍ଜନା ଗୁଡିକ ଲୋକମାନେ ପୌରପାଳିକା ନିକଟରେ ପକାଇଥାନ୍ତି । ଫଳରେ ଉକ୍ତ ଅଞ୍ଚଳରେ ଗନ୍ଧମୟ ପରିବେଶ ସୃଷ୍ଟି ହେଉଛି ।
ଏନେଇ ସ୍ଥାନୀୟ ଲୋକେ ପୌରପାଳିକାକୁ ବାରମ୍ବାର ଜଣେଇ ଥିଲେ ହେଁ ପୌର ପ୍ରଶାସନ କର୍ଣ୍ଣପାତ କରୁନଥିଲେ । ବାଧ୍ୟ ହୋଇ ଉକ୍ତ ୱାର୍ଡର ଲୋକେ ନିଜର ବର୍ଜ୍ୟବସ୍ତୁ ପୌରପାଳିକା ଅଧିକାରୀଙ୍କ ଘର ସାମ୍ନା ଓ ପୌରପାଳିକାର ଅଫିସ ଆଗରେ ପକେଇ ପ୍ରତିବାଦ କରିଛନ୍ତି ।
ଏନେଇ ପୌର ପ୍ରଶାସନ ଓ ୱାର୍ଡବାସୀଙ୍କ ମଧ୍ୟରେ କିଛି ସମୟ ଉତ୍ତେଜନା ପ୍ରକାଶ ପାଇଥିଲା । ତେବେ ପୌରପାଳିକା ଅଧିକାରୀଙ୍କ ପ୍ରତିକ୍ରିୟା ମିଳିପାରି ନାହିଁ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
