କେନ୍ଦୁଝର: ବିଜେପି ରାଜ୍ୟରେ ଆରମ୍ଭ କରିଛି 'ଜବାବ ମାଗୁଛି ଓଡିଶା ଅଭିଯାନ' । ଏନେଇ କେନ୍ଦୁଝରରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇଛନ୍ତି ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଅର୍ଜୁନ ମୁଣ୍ଡା । ଏହି କାର୍ଯ୍ୟକ୍ରମରେ ସେ ବିଭିନ୍ନ ଯୋଜନାରେ ବିଫଳତା ପାଇଁ ରାଜ୍ୟ ସରକାରଙ୍କୁ ଦାୟୀ କରିଛନ୍ତି । ସେ କହିଛନ୍ତି ରାଜ୍ୟରେ ସବୁ କ୍ଷେତ୍ରରେ ବିଫଳ ହୋଇଛି ରାଜ୍ୟ ସରକାର ।
ଶୁକ୍ରବାର ପାଟଣା ନିର୍ବାଚନ ମଣ୍ଡଳୀ ମାଛଗଡ଼ ହାଇସ୍କୁଲ ପଡିଆରେ ଆୟୋଜିତ ଏକ ବିରାଟ ସାଧାରଣ ସଭାରେ ଆଜି ଅପରାହ୍ନ ୪ଟାରେ ଅର୍ଜୁନ ମୁଣ୍ଡା ପହଞ୍ଚି ସଭାକୁ ସମ୍ବୋଧନ କରିଥିଲେ। ଏହି ସଭାରେ ଶତାଧିକ ବିଜେପି ସମର୍ଥକ ଏକତ୍ରିତ ହୋଇଥିଲେ । ବିଶାଳ ଭିଡକୁ ଦେଖି ଅର୍ଜୁନ ରାଜ୍ୟରେ ବିଜେପି ଆଗାମୀ ନିର୍ବାଚନରେ ସରକାର ଗଢିବା ନେଇ ଆଶାବାଦୀ ବୋଲି ପ୍ରକାଶ କରିଛନ୍ତି। ଏଥିସହିତ ଆଗାମୀ ନିର୍ବାଚନରେ ଜନସାଧାରଣଙ୍କୁ ନରେନ୍ଦ୍ର ମୋଦିଙ୍କୁ ପୁନର୍ବାର ପ୍ରଧାନମନ୍ତ୍ରୀ କରିବା ପାଇଁ ଜନସଭାକୁ ସମ୍ବୋଧନ କରି କହିଛନ୍ତି ।
ଜଣାଯାଇଛି ଯେ ଶୁକ୍ରବାର ସାହରପଡା ବ୍ଲକ ମାଛଗଡ଼ ପଞ୍ଚାୟତର ହାଇସ୍କୁଲ ପଡିଆରେ ଜିଲ୍ଲା ବିଜେପି ପକ୍ଷରୁ ଏକ ବିରାଟ ଜନସଭା ଅନୁଷ୍ଠିତ ହୋଇଥିଲା । ଏଥିରେ ପାଟଣା ନିର୍ବାଚନ ମଣ୍ଡଳୀର ପାଞ୍ଚ ହଜାରରୁ ଊର୍ଦ୍ଧ୍ୱ କର୍ମୀ ଯୋଗ ଦେଇଥିଲେ। ଅନ୍ୟମାନଙ୍କ ମଧ୍ୟରେ ପୂର୍ବତନ ସାଂସଦ ତଥା ରାଜ୍ୟ ସାଧାରଣ ସମ୍ପାଦକ ଅନନ୍ତ ନାଏକ, ପୂର୍ବତନ ଉପମୁଖ୍ୟ ସଚେତକ ମୋହନ ମାଝୀ ଓ ବହୁ ଜିଲ୍ଲାସ୍ତରୀୟ କର୍ମୀ ଉପସ୍ଥିତ ଥିଲେ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
