କେନ୍ଦୁଝର: ସମ୍ପୂର୍ଣ୍ଣ ଜିଲ୍ଲାରେ ବନ୍ଦ ହେଲା ଇଣ୍ଟରନେଟ ସେବା । ଗତ ଗୁରୁବାର ରାତି ୧୨ଟା ଠାରୁ ଏଯାବତ ଇଣ୍ଟରନେଟ ସେବାରୁ ବଞ୍ଚିତ ଜିଲ୍ଲାବାସୀ । ଖଣି ଅଞ୍ଚଳ ଯୋଡ଼ାରେ ସୋମବାର ୨ ଗୋଷ୍ଠୀ ମଧ୍ୟରେ ସଂଘର୍ଷ ଘଟିବା ପରେ ଏହି ସେବା ବନ୍ଦ କରାଯାଇଛି । ରାମ ନବମୀରେ ମନ୍ଦିରକୁ ଧାର୍ମିକ ପତାକା ନେଇ ଯିବା ସମୟରେ ଘଟିଥିଲା ଏହି ଗୋଷ୍ଠୀ ସଂଘର୍ଷ ।
ସଂଘର୍ଷ ଘଟିଥିବା ସ୍ଥାନ ଯୋଡ଼ାରେ ଯିବା ଆସିବା ଉପରେ ନିଷେଧାଦେଶ ଜାରି କରାଯାଇଥିଲା । ଏହାପରେ ଏଠାରେ ୧୪୪ ଧାରା ଜାରି କରାଯାଇଛି । ଆସନ୍ତା ବୁଧବାର ୧୦ଟା ପର୍ଯ୍ୟନ୍ତ ଏହି କଟକଣାକୁ ଲାଗୁ କରାଯାଇଛି । ଏହାସହିତ ଯୋଡ଼ାରେ ୧୪ ପ୍ଲାଟୁନ ଫୋର୍ସ ନିଯୋଜିତ ଥିବା ଜଣାପଡ଼ିଛି । ଗତ ସୋମବାର ଏହି ଅଞ୍ଚଳରେ ୨ ଗୋଷ୍ଠୀଙ୍କ ମଧ୍ୟରେ ସଂଘର୍ଷ ଘଟିଥିଲା । ପୋଲିସ ସ୍ଥିତି ନିୟନ୍ତ୍ରଣ ପାଇଁ ଫାଙ୍କା ଗୁଳିଚାଳନା ପରେ ଉଭୟ ପକ୍ଷରୁ ପୋଲିସ କର୍ମଚାରୀଙ୍କ ଉପରକୁ ପଥର ମାଡ଼ ହୋଇଥିଲା ।
ରିପୋର୍ଟ ଅନୁସାରେ ରାମ ନବମୀ ପାଳନ ସମୟରେ ଘଟିଥିଲା ସଂଘର୍ଷ । ଏକ ଧାର୍ମିକ ଗୋଷ୍ଠୀ ରାମ ନବମୀ ଅବସରରେ ରବିବାର ଶୋଭାଯାତ୍ରା କରି ୱାର୍ଡ ନଂ ୪ରେ ଥିବା ଶିବ ମନ୍ଦିରକୁ ପତାକା ନେଇ ଯିବାକୁ ଚାହୁଁଥିଲେ । ହେଲେ ଏହାକୁ ଅନୁମିତ ଦେଇନଥିଲା ପୋଲିସ । କେବଳ ୫ ଜଣ ପତାକା ନେଇ ମନ୍ଦିରକୁ ଯାଇପାରିବେ ବୋଲି ପୋଲିସ କହିଥିଲା । ତେବେ ଏହି ଘଟଣାକୁ ନେଇ ଆନ୍ଦୋଳନ କରିଥିଲା ଉକ୍ତ ଧାର୍ମିକ ଗୋଷ୍ଠୀ ।
ଏହାପରେ ସେମାନେ ହନୁମାନ ମନ୍ଦିର ନିକଟ ରାସ୍ତାକୁ ଅବରୋଧ କରି ଆନ୍ଦୋଳନ କରିଥିଲେ । ଏହାପରେ ପତାକା ନେଇ ମନ୍ଦିର ଯିବାକୁ ବାହାରିଥିଲେ । ଏହି ସମୟରେ ଅନ୍ୟ ଏକ ଗୋଷ୍ଠୀ ସେମାନଙ୍କୁ ବିରୋଧ କରିଥିଲେ । ଏହାପରେ ଦୁଇ ଗୋଷ୍ଠୀଙ୍କ ମଧ୍ୟରେ ସଂଘର୍ଷ ଘଟିଥିଲା ବୋଲି ଜଣାପଡ଼ିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
