କେନ୍ଦୁଝର:ବଡ଼ବିଲ ରେଞ୍ଜ ଅଧିନସ୍ଥ ଏନଏଚ ୫୨୦ ଗୁଆଲି ନିକଟରୁ ଦେଢ଼ଲକ୍ଷ ଟଙ୍କା ମୂଲ୍ୟର ଚୋରା ପିଆଶାଳ କାଠ ବୋଝେଇ ଏକ ପିକଅପ ଭ୍ୟାନକୁ ଜବତ କରିବା ସହ ଏଥିରେ ସଂପୃକ୍ତ ଡ୍ରାଇଭରକୁ ଗିରଫ କରିଛି ବନ ବିଭାଗ ।
ସୂଚନା ଅନୁଯାୟୀ, ସୁନ୍ଦରଗଡ଼ ଜିଲ୍ଲା କୋଇଡ଼ା ଅଞ୍ଚଳରୁ ଜେଏଚ୍ ୦୫ ସିଏମ୍ ୮୪୧୦ ନମ୍ବର ପିକଅପ ଭ୍ୟାନରେ ମୂଲ୍ୟବାନ ପିଆଶାଳ କାଠ ବୋଝେଇ ହୋଇ ଝାଡ଼ଖଣ୍ଡର ମଝିଗାଁ ଅଞ୍ଚଳକୁ ଚୋରା ଚାଲାଣ ହେଉଥିବା ବିଶ୍ବସ୍ଥ ସୁତ୍ରରୁ ଖବର ପାଇଥିଲା ବନବିଭାଗ । ସୂଚନାକୁ ଆଧାର କରି ବଡ଼ବିଲ ବାନାଞ୍ଚଳ ଅଧିକାରୀ ଅନ୍ୟ ବନ କର୍ମଚାରୀଙ୍କ ସହ ଗୁଆଲି ନିକଟରେ ଜଗି ରହିଥିଲେ ଏବଂ ପିକଅପ୍ ଭ୍ୟାନ ସେହି ବାଟ ଦେଇ ପଳାଇଯିବାକୁ ଉଦ୍ୟମ କରୁଥିବା ବେଳେ, ଗାଡ଼ିକୁ ଧରିବାରେ ସକ୍ଷମ ହୋଇଥିଲେ ।
ଗାଡ଼ିରେ ସମୁଦାୟ ୧୫ ଖଣ୍ଡ ପିଆଶାଳ କାଠ ଗଣ୍ଡି ରହିଛି, ଯାହା ପାଖାପାଖି ୬୧ ଘନଫୁଟ ହେବ ବୋଲି ବନବିଭାଗ ସୂଚନା ଦେଇଛି । ଗିରଫ ପିକଅପ ଭ୍ୟାନ ଡ୍ରାଇଭର, ଏମ୍ ଡି ଇଶାକକୁ ଶନିବାର କୋର୍ଟ ଚାଲାଣ କରାଯାଇଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
