ଆନନ୍ଦପୁର: ପ୍ରେମ ବିବାହ କରି ପ୍ରାୟ ଦୁଇମାସ ହେବ ସ୍ବାମୀ ସହ ଶାଶୁଘରେ ରହୁଥିବା ଝିଅକୁ ଗୁଣ୍ଡା ଲଗାଇ ଉଠାଇ ନେଇଛନ୍ତି ବାପଘର ଲୋକେ । ଝିଅକୁ ଉଠାଇ ନେବା ସମୟରେ ଶାଶୁ, ଶ୍ବଶୁର, ସ୍ବାମୀ ଓ ନଣନ୍ଦଙ୍କୁ ନିର୍ଧୁମ ମାଡମରା ଯାଇଥିବା ଅଭିଯୋଗ ହୋଇଛି ।
ତେବେ ଏହିସମୟରେ ବୋହୂକୁ ଉଠାଇ ନେବାପରେ ଜଣେ ଗୁଣ୍ଡାକୁ କାବୁକରି ପୋଲିସକୁ ହସ୍ତାନ୍ତର କରିଛନ୍ତି ପରିବାର ଲୋକେ । ଏଭଳି ଏକ ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଘଷିପୁରା ଥାନ ନାରଙ୍ଗପୁର ଗାଁରେ । ଗାଁର ଦିଲ୍ଲୀପ କୁମାର ପରିଡାଙ୍କ ପୁଅ ସମ୍ବିତ ଅନୁଗୋଳ ଥାନା ଅମଲାପଡା ଅଞ୍ଚଳର ଅଶୋକ ବେହେରାଙ୍କ ଝିଅ ଜ୍ୟୋତିଙ୍କୁ ଭଲ ପାଉଥିଲେ । କିଛିଦିନ ତଳେ ଜ୍ୟୋତି ସମ୍ବିତଙ୍କ ସହ ଘରୁ ପଳାଇ ଆସି ବିବାହ କରି ଶାଶୁଘରେ ରହୁଥିଲେ । ହେଲେ ଜ୍ଯୋତିଙ୍କ ବାପଘର ଲୋକେ ଏହି ବାହାଘରରେ ରାଜି ନଥିବାରୁ ବାରମ୍ବାର ଝିଅକୁ ନେଇଯିବାର ଧମକ ଦେଉଥିଲେ ।
ଗତକାଲି(ଶୁକ୍ରବାର) ଜ୍ୟୋତିର ଭାଇ ଦିଲ୍ଲୀପ୍ ବେହେରା ଦୁଇଟି ଗାଡିରେ ଗୁଣ୍ଡା ଆଣି ସମ୍ବିତଙ୍କ ଘରେ ପଶି ଜୋର୍ ଜବରଦସ୍ତ ଭଉଣୀକୁ ଉଠାଇନେବା ସହ ସମ୍ବିତ୍ଙ୍କ ପରିବାର ଲୋକଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ଏନେଇ ଘଷିପୁରା ପୋଲିସ୍ ନିକଟରେ ଲିଖିତ ଅଭିଯୋଗ ଏବଂ ଅଟକ ଅଭିଯୁକ୍ତର ବୟାନକୁ ଆଧାର କରି ପୋଲିସ୍ ଘଟଣାର ତଦନ୍ତ ଆରମ୍ଭ କରିଛି ।
ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ, ଇଟିଭି ଭାରତ
