କେନ୍ଦୁଝର: ସରକାର ଚାଷୀଙ୍କ ପାଇଁ କରୁଛନ୍ତି ଅନେକ ଯୋଜନା । ଏହି ଯୋଜନା ଗୁଡିକ ପାଇଁ ଖର୍ଚ୍ଚ କରୁଛନ୍ତି କୋଟି କୋଟି ଟଙ୍କା । କିନ୍ତୁ ଏହି ଟଙ୍କା ଚାଷୀଙ୍କ ଉନ୍ନତିରେ ଠିକ ଭାବେ ଉପଯୋଗ ହେଉନଥିବା ବହୁ ସମୟରେ ଅଭିଯୋଗ ହୁଏ । ଯେଉଁଠି ଚାଷୀଙ୍କ ପାଇଁ ଆବଶ୍ୟକ ସେଇଠି କିଛି ଯୋଜନା କାର୍ଯ୍ୟକାରୀ ହେଉନଥିବା ଦେଖାଦେଉଛି । ଏଭଳି ଏକ ଅଞ୍ଚଳ ହେଉଛି ହରିଚନ୍ଦନପୁର ବ୍ଲକ ବଡ଼କମଣ୍ଡରା ଗ୍ରାମରେ ।
ଆଦିବାସୀ ବହୁଳ ଗ୍ରାମ ହୋଇଥିଲେ ହେଁ ଉକ୍ତ ଗ୍ରାମରେ ଚାଷ ଉପରେ ନିର୍ଭର କରିଥାନ୍ତି ପ୍ରାୟ ଲୋକେ। ଗ୍ରାମବାସୀ ପାରମ୍ପରିକ ଧାନ ଚାଷ ସହ ଅର୍ଥକାରୀ ଫସଲ ମଧ୍ୟ ଚାଷ କରିଥାନ୍ତି । ହରଡ଼, ଗେଣ୍ଡୁ ,ଲଙ୍କା ଆଦି ସହ ବିଲାତି ବହୁଳ ପରିମାଣରେ ଚାଷ କରିଥାନ୍ତି । ଉକ୍ତ ଗ୍ରାମରେ ଏକ ଶହ ଏକରରୁ ଊର୍ଦ୍ଧ୍ବ ବିଲରେ ବିଲାତି ଚାଷ କରାଯାଇଥାଏ । କେନ୍ଦୁଝର ସହର ସହ ବାହାରର ବ୍ୟବସାୟୀ ଉକ୍ତ ଗ୍ରାମରୁ ବିଲାତି ନେଇଥାନ୍ତି ।
ଗ୍ରାମରେ ଏତେ ପରିମାଣର ବିଲାତି ଚାଷ ହେଉଥିଲେ ହେଁ କୃଷି ବିଭାଗର ଯେପରି ନିଘା ନଥିଲା ଭଳି ଗ୍ରାମବାସୀ ଅଭିଯୋଗ କରିଛନ୍ତି । ଗ୍ରାମରେ ଜଳ ସେଚନର ସୁବିଧା ନଥିବା ସହ ଶୀତଳ ଭଣ୍ଡାର ମଧ୍ୟ ନାହିଁ । ଫଳରେ ବହୁ ସମୟରେ ଚାଷୀ ଅଭାବୀ ବିକ୍ରିର ଶିକାର ହେଉଥିବା ଅଭିଯୋଗ କରିଛନ୍ତି । ନିଜେ ଚାଷ କରି ସମୃଦ୍ଧ ହୋଇଥିବା ଗ୍ରାମରେ ସରକାରୀ ସ୍ତରରେ ସହଯୋଗ ମିଳିଲେ ଆହୁରି ସ୍ବାବଲମ୍ବୀ ହୋଇପାରିବେ ବୋଲି ଚାଷୀ ଆଶା ରଖିଛନ୍ତି । ଏନେଇ କୃଷି ବିଭାଗର ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
