ଆନନ୍ଦପୁର: ଇଟିଭି ଭାରତର ପ୍ରଭାବ । ଖବର ପ୍ରସାରଣ ପରେ ସାହାଯ୍ୟର ହାତ ବଢ଼ାଇଲା ଏଲଆଇସି । ଏଲଆଇସି କର୍ମଚାରୀ ମାନେ ଅସହାୟ 3 ପିଲାମାନଙ୍କ ପାଖରେ ପହଞ୍ଚି ପରିସ୍ଥିତି ଅନୁଧ୍ୟାନ କରି ସହାୟତା ଯୋଗାଇଛନ୍ତି । ଏନେଇ ଇଟିଭି ଭାରତକୁ ଧନ୍ୟବାଦ ଦେଇଛନ୍ତି ଏଲଆଇସି କର୍ମକର୍ତ୍ତା ଓ ଗ୍ରାମବାସୀମାନେ ।
ଆନନ୍ଦପୁର ବ୍ଲକ ସୁନ୍ଦୁରିଆ ଗ୍ରାମର କାହ୍ନୁଚରଣ ପିଙ୍ଗୁଆଙ୍କ ବିୟୋଗ ପରେ ତାଙ୍କର 3 ସନ୍ତାନ ଜୀବନ ବଞ୍ଚିବା ପାଇଁ ସଂଘର୍ଷ କରୁଥିଲେ । 5 ବର୍ଷ ପୂର୍ବେ ଏମାନଙ୍କ ମା' ଏମାନଙ୍କୁ ଛାଡି ଚାଲିଯାଇଥିଲେ । କାହ୍ନୁଚରଣ ନିଜ ପିଲାଙ୍କୁ ଅତି ସ୍ନେହ ଓ ଆଦରରେ ରଖିଥିଲେ । ପେଶାରେ ଡ୍ରାଇଭର ଥିବା କାହ୍ନୁ ପିଲାଙ୍କ ପାଇଁ ନିଜ ବୃତ୍ତିକୁ ଛାଡି ପିଲାଙ୍କ ପାଖରେ ରହି ମୁଲ ମଜୁରୀ କରୁଥିଲେ । ଆଉ ପିଲାଙ୍କ ଲାଳନପାଳନ ଓ ପାଠପଢା କୌଣସିଥିରେ ଉଣା କରିନଥିଲେ । ହେଲେ ତାଙ୍କ ଦେହାନ୍ତ ପରେ ତିନି ପିଲାଙ୍କ ପାଇଁ ପାଠପଢା ତ ଦୂରର କଥା, ପେଟକୁ ଦିଓଳି ମୁଠାଏ ଦାନା ମିଳିବା ମଧ୍ୟ ଏକ ପ୍ରକାର ମୁସ୍କିଲ ହୋଇଯାଇଥିଲା । 3 ନୀରିହ ନିଷ୍ପାପ ଶିଶୁଙ୍କ ଦୁଃଖ ଖବର 'ଇଟିଭି ଭାରତ'ରେ ଅଗଷ୍ଟ 14ରେ ପ୍ରସାରଣ ହୋଇଥିଲା । ଆଉ ଏହି ଖବର ଦେଖିବା ପରେ ସହାୟତାର ହାତ ବଢ଼ାଇଛି ଏଲଆଇସି । ପିଲାମାନଙ୍କ ପାଖରେ ପହଞ୍ଚି ସେମାନଙ୍କୁ ଶୁଖିଲା ଖାଦ୍ୟ ଦେବା ସହ ପଢିବା ପାଇଁ ପାଠ୍ୟ ସାମଗ୍ରୀ ଏବଂ ଚାଲିବା ପାଇଁ କିଛି ଟଙ୍କା ସହ ଖାଦ୍ୟ ସାମଗ୍ରୀ ଦେଇଛନ୍ତି । ଏହାସହ ପିଲା ମାନଙ୍କର ଭବିଷ୍ୟତ ପାଇଁ ସବୁବେଳେ ଏଲଆଇସି ସହାୟତା କରିବ ବୋଲି ଏଲଆଇସିର କର୍ମକର୍ତ୍ତା କହିଛନ୍ତି ।
ସେପଟେ କୋରୋନା ଭଳି ବିପତ୍ତି ସମୟରେ ମା' ବାପାଙ୍କୁ ହରାଇ ଅସହାୟ ହୋଇପଡିଥିବା ଏହି ନିଷ୍ପାପ ଶିଶୁ ମାନଙ୍କ ପାଖରେ ଏଲଆଇସି ପହଞ୍ଚି ସହଯୋଗ କରିଥିବାରୁ ସାହାଯ୍ୟକାରୀ ମାନଙ୍କୁ ଧନ୍ୟବାଦ ଦେଇଛନ୍ତି ଗ୍ରାମବାସୀ । ଏଥିସହିତ ପ୍ରଶାସନ ମଧ୍ୟ ତୁରନ୍ତ ସହାୟତାର ହାତ ବଢ଼ାଇ ପିଲାମାନଙ୍କର ଭବିଷ୍ୟତ ଗଢିବା ପାଇଁ ବ୍ୟବସ୍ଥା କରୁ ବୋଲି ଗ୍ରାମବାସୀଙ୍କ ପକ୍ଷରୁ ଦାବି ହୋଇଛି ।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
