କେନ୍ଦୁଝର: ଜିଲ୍ଲାରେ ହାତୀ ଉତ୍ପାତ ଦେଖିବାକୁ ମିଳିଛି । ତେଲକୋଈ ବନାଞ୍ଚଳରେ ଥମିବାର ନା ଧରୁନି ବଣୁଆ ହାତୀଙ୍କ ଉପଦ୍ରବ। ବୁଧବାର ବିଳମ୍ବିତ ରାତିରେ ପୁଣି କୁଲାଡେରା ଗାଁରେ ଉପଦ୍ରବ କରିଛନ୍ତି ଦନ୍ତା । ଗାଁର 3ଟି ଘର ଭାଙ୍ଗିବା ସହ ବର୍ଷକ ପାଇଁ ସାଇତା ହୋଇ ରହିଥିବା ଫସଲ ସବୁ ଖାଇ ଯାଇଛନ୍ତି ।
ଏ ସମସ୍ୟା ଗୋଟିଏ ଦିନର ନୁହେଁ, ବର୍ଷ ବର୍ଷ ଧରି ଏହି ସମସ୍ୟା ଲାଗିରହିଛି । ହାତୀ ଆତଙ୍କ ନେଇ ସବୁବେଳେ ଲୋକଙ୍କୁ ଡରି ଡରି ରହିବାକୁ ପଡୁଛି । ବୁଧବାର ରାତିରେ କୁଲାଡେରା ଗାଁରେ 3ଟି ଘର ଭାଙ୍ଗିଛନ୍ତି ଦନ୍ତା ହାତୀ । ଭାଗବାନଙ୍କ କୃପାରୁ ଅଳ୍ପକେ ବର୍ତ୍ତି ଯାଇଛନ୍ତି ପରିବାର ଲୋକ ।
ଘର ଭାଙ୍ଗିବା ସହିତ ଖରା ବର୍ଷା ସହି ସଞ୍ଚୟ କରି ରଖିଥିବା ଫସଲକୁ ମଧ୍ୟ ଖାଇଯାଇଛନ୍ତି ହାତୀପଲ । ଜିଲ୍ଲାରେ ଏପରି ସମସ୍ୟା ଥିଲେ ବି ବନ ବିଭାଗ ହାତ ଟେକି ବସିଥିବା ଅଭିଯୋଗ ହୋଇଛି । ହାତୀ ଉପଦ୍ରବରେ କ୍ଷତି ସହୁଥିବା ସମସ୍ତ କ୍ଷତିଗ୍ରସ୍ତଙ୍କୁ ସହାୟତା ଯୋଗାଇ ଦେବାକୁ ଦାବି ହୋଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର,ଇଟିଭି ଭାରତ
