କେନ୍ଦୁଝର: ପୁଣି ହାତୀ ଆତଙ୍କ । ଦୀର୍ଘଦିନ ଧରି ଗୋଠ ଚାଢି ଚାଲି ଆସିଥିବା ଦନ୍ତା ହାତୀ ଚଳାଇଛି ଉପଦ୍ରବ । ରାତି ଅଧରେ ଘରର କାନ୍ଥ ଭାଙ୍ଗି ଘରେ ପଶି ଚାଉଳ ଖାଇବାକୁ ଚେଷ୍ଟା କରିଛି ଦନ୍ତା । ପୁଣି ଦୋକାନ ଘରେ ପଶି ବ୍ୟାପକ କ୍ଷୟକ୍ଷତି କରିଛି । ଫଳରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳି ଯାଇଛି ।
ଏଭଳି ଘଟଣା ଘଟିଛି ମଙ୍ଗଳବାର କେନ୍ଦୁଝର ବଂଶପାଳ ବ୍ଲକ ବିଜେପି ରେଞ୍ଜ ଅନ୍ତର୍ଗତ ଫୁଲଝର ପଞ୍ଚାୟତର ରଙ୍ଗାମାଟିଆ ଗ୍ରାମରେ । ବ୍ରଜମୋହନ ସିଂ ନାମକ ବ୍ୟକ୍ତି ପରିବାର ସହ ଶୋଇଥିବା ବେଳେ ବଣୁଆ ହାତୀଟି ଆକ୍ରମଣ କରିଥିଲା । ଫଳରେ କଷ୍ଟେ ମଷ୍ଟେ ଘରୁ ବାହାରି ଆସିଥିଲେ ବ୍ରଜମୋହନ ସିଂଙ୍କ ପରିବାର ।
କେବଳ ଏତିକି ନୁହେଁ ଦନ୍ତା ହାତୀଟି କୁସୁମିତା ଗ୍ରାମର ଆଶ୍ରମ ବିଦ୍ୟାଳୟର ବାଉଁଶ ଜଙ୍ଗଲ ଓ ଉକ୍ତ ଗ୍ରାମର ବସନ୍ତ ନାଏକଙ୍କ ଦୋକାନ ଘରେ ପଶି ବ୍ୟାପକ କ୍ଷୟକ୍ଷତି କରିଥିଲା । ଏପର୍ଯ୍ୟନ୍ତ ଜଙ୍ଗଲ ବିଭାଗର କୌଣସି ଅଧିକାରୀ ଉକ୍ତ ସ୍ଥାନରେ ପହଞ୍ଚି ନଥିବା ଜଣାପଡ଼ିଛି । ଦନ୍ତା ହାତୀଟି ଦୀର୍ଘ ଦିନ ଧରି ବୁଲୁଥିବା ବେଳେ ଜଙ୍ଗଲ ବିଭାଗ କିଛି କାର୍ଯ୍ୟାନୁଷ୍ଠାନ ନେଉ ନଥିବା ଅଭିଯୋଗ ହେଉଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
