କେନ୍ଦୁଝର: ମଙ୍ଗଳବାର ଏକ ହାତୀର ଗଳିତ ମୃତଦେହ ଠାବ ହୋଇଛି । ଚମ୍ପୁଆ ରେଞ୍ଜ ନୁଣ ଗାଢିଆ ସ୍ଥିତ କାଶିଆ ଗାଁ ନିକଟ ଜଙ୍ଗଲରେ ଏହି ଘଟଣା ଘଟିଛି । ଏକ ମାସ ପୂର୍ବରୁ ହାତୀର ମୃତ୍ୟୁ ହୋଇଥିବା ନେଇ ସନ୍ଦେହ କରାଯାଉଛି ।
ବନ ବିଭାଗର କହିବାନୁସାରେ ପ୍ରାୟ ଏକ ମାସ ହେବ ହାତୀର ମୃତ୍ୟୁ ହୋଇଛି । ମଙ୍ଗଳବାର ଖବର ପାଇ ବନ ବିଭାଗ ସହ ଏକ ପଶୁ ଡାକ୍ତରୀ ଟିମ ଘଟଣାସ୍ଥଳରେ ପହଞ୍ଚିଥିଲେ । ଏହାସହ ଘଟଣାର ତଦନ୍ତ ଆରମ୍ଭ କରିଛନ୍ତି ।
ହାତୀଟି କେଉଁ କାରଣରୁ ମରିଛି ତାହା ଜଣାପଡିନାହିଁ । ତେବେ ଏବେ ପ୍ରଶ୍ନ ଉଠୁଛି ବନ ବିଭାଗ ହାତୀଙ୍କ ପ୍ରତି କେତେ ଯତ୍ନବାନ । ହାତୀଙ୍କ ପ୍ରତି କିପରି ଧ୍ୟାନ ରଖାଯାଉଛି ତାହା ଏଥିରୁ ସ୍ପଷ୍ଟ ଅନୁମେୟ । ମାସେ ହେଲା ହାତୀର ମୃତ୍ୟୁ ହୋଇଥିବା ବେଳେ ଏନେଇ କୌଣସି ଖବର ନପାଇବା ବନ ବିଭାଗର ଅପାରଗତାକୁ ଦର୍ଶାଉଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
