କେନ୍ଦୁଝର: ହାତୀ ବେଶରେ ଦର୍ଶନ ଦେଲେ ଶ୍ରୀବଳଦେବଜୀଉ । ସ୍ନାନବେଦୀରେ ବିଜେ କଲେ ଚତୁର୍ଦ୍ଧାମୂର୍ତ୍ତି । ସ୍ନାନ ପୂର୍ଣ୍ଣିମାରେ 108 କଳସ ସୁବାସିତ ଜଳରେ ମହାସ୍ନାନ କଲେ ମହାପ୍ରଭୁ ।
କେନ୍ଦୁଝରର ଆରାଧ୍ୟ ଦେବତା ପ୍ରଭୁ ଶ୍ରୀ ବଳଦେବଜୀଉଙ୍କର ସ୍ନାନ ପୂର୍ଣ୍ଣିମା ରୀତିନୀତି ଅନୁସାରେ ଅନୁଷ୍ଠିତ ହୋଇଛି । ଆଜି (ସୋମବାର) ସକାଳୁ ଶ୍ରୀଜୀଉମାନଙ୍କର ବିଭିନ୍ନ ପୂଜାର୍ଚ୍ଚନା ପରେ ବଡଦେଉଳରୁ ସ୍ନାନମଣ୍ଡପକୁ ଗୋଟି ପହଣ୍ଡିରେ ବିଜେ କରାଯାଇଛି । ପରେ ସେଠାରେ ୧୦୮ କଳସ ସୁବାସିତ ଜଳ ରେ ଶ୍ରୀଜୀଉମାନଙ୍କୁ ମହାସ୍ନାନ କରାଯାଇଛି ।
ମହାସ୍ନାନ ପରେ ଚକାଭିଡା ହୋଇ ଶ୍ରୀଜୀଉମାନଙ୍କୁ ଗଜାନନ ବେଶ କରାଯାଇଛି । ତେବେ କେନ୍ଦୁଝର ଶ୍ରୀ ବଳଦେବଜୀଉଙ୍କ ମନ୍ଦିରରେ ବିଶେଷତ୍ଵ ରହିଛି । ଶ୍ରୀଜୀଉଙ୍କୁ ଅଁଳା ଓ ତୁଳସୀ ପତ୍ରରେ ଶ୍ରୀଜୀଉମାନଙ୍କୁ ହାତୀବେଶରେ ସଜ୍ଜିତ କରାଯାଏ । ଏହି ବେଶରେ ଦର୍ଶନ କଲେ କୋଟି ଜନ୍ମର ପୁଣ୍ୟ ମିଳିଥାଏ ବୋଲି ବିଶ୍ୱାସ ରହିଛି ।
ସେପଟେ ସର୍ବ ପୁରାତନ ପୀଠ ସିଦ୍ଧ ମଠ ଠାରେ ଥିବା ସିଦ୍ଧ ଜଗନ୍ନାଥଙ୍କର ମଧ୍ୟ ସ୍ନାନ ପୂର୍ଣ୍ଣିମା ଅନୁଷ୍ଠିତ ହୋଇଛି । ଏଠାରେ କେବଳ ପ୍ରଭୁ ଜଗନ୍ନାଥଙ୍କର ସ୍ନାନ କରାଯାଏ । ବଡ ଧୁମଧାମ୍ରେ ଏଠାରେ ସ୍ନାନ ପୂର୍ଣ୍ଣିମା ପାଳନ କରାଯାଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
