କେନ୍ଦୁଝର: ପୁରୁଣାବର୍ଷକୁ ବିଦାୟ ଦେଇ ଆସିଛି ନବବର୍ଷ । ଏହି ନୂତନ ବର୍ଷ ସମସ୍ତଙ୍କ ମନରେ ଆନନ୍ଦ ଉଲ୍ଲାସର ବର୍ଷ ହେବା ସହ ସୁଖ ସମୃଦ୍ଧି ଆଣିବା ପାଇଁ ଦେବାଳୟରେ ଭିଡ ଜମାଇଛନ୍ତି ରାଜ୍ୟବାସୀ ।
ଏହି ନୂତନ ବର୍ଷରେ କିପରି ପରିବାର ଲୋକେ ସୁଖି ଓ ସୁସ୍ଥ ରହିବେ ସେଥିପାଇଁ ସକାଳୁ ସକାଳୁ ଘଟଗାଁର ମା' ତାରିଣୀଙ୍କ ନିକଟରେ ଶ୍ରଦ୍ଧାଳୁ ମାନେ ପହଞ୍ଚିଛନ୍ତି । ହାତରେ ନଡ଼ିଆ ଧରି ମା'ଙ୍କୁ ପରିବାରର ଶୁଭ ମନାସିଛନ୍ତି ଭକ୍ତ ମାନେ । ଏହି ବର୍ଷର ପ୍ରଥମ ଦିନରେ ମା' ତାରିଣୀ ସୁନାବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଇ ମନସ୍କାମନା ପୁରଣ କରୁଛନ୍ତି ।
ତେବେ ପ୍ରତ୍ୟେକ ବର୍ଷ ଏହି ଦିନ ପ୍ରବଳ ଭକ୍ତଙ୍କ ସମାଗମ ହୋଇଥାଏ । ଆଉ ଚଳିତବର୍ଷ ମଧ୍ୟ ଲକ୍ଷାଧିକ ଭକ୍ତଙ୍କ ସମାଗମକୁ ଆଖିରେ ରଖି ମନ୍ଦିର ଟ୍ରଷ୍ଟ ବୋର୍ଡ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି । ଏଥି ସହ ସ୍ବେଚ୍ଛାସେବୀ ମାନେ ଭକ୍ତଙ୍କ ଧାଡି ଦର୍ଶନ ପାଇଁ ବ୍ୟବସ୍ଥାରେ ଲାଗିପଡିଛନ୍ତି । ନୂତନ ବର୍ଷ ପାଇଁ ଟ୍ରଷ୍ଟ ବୋର୍ଡ ପକ୍ଷରୁ ଭକ୍ତଙ୍କ ପାଇଁ ମାଗଣାରେ ନଡିଆ ଲଡୁର ବ୍ୟବସ୍ଥା କରାଯାଇଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
