କେନ୍ଦୁଝର: ମାରାତ୍ମକ କୋରୋନା ଭୁତାଣୁ ଏବେ ମହାମାରୀର ରୂପ ନେଇ ସାରା ବିଶ୍ବକୁ କବଳିତ କରିଛି । ଏହାର ପ୍ରଭାବରେ ବିଶ୍ବର ଶକ୍ତିଶାଳୀ ଦେଶ ଗୁଡିକ ମଧ୍ୟ ବର୍ତ୍ତି ପାରିନାହାନ୍ତି । କୋରୋନା ପ୍ରଭାବରେ ଭାରତରେ ଵର୍ତମାନ ପର୍ଯ୍ୟନ୍ତ 9 ଶହରୁ ଉର୍ଦ୍ଧ୍ବ କୋରୋନା ଆକ୍ରାନ୍ତ ହୋଇଥିବା ବେଳେ 26 ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ସହରରୁ ଗାଁ ଧୀରେ ଧୀରେ ଏହାର ପ୍ରଭାବ ଦେଖିବାକୁ ମିଳୁଛି । ଏହାର କିଛି ଝଲକ ଦେଖିବାକୁ ମିଳିଛି ଆଦିବାସୀ ଅଧ୍ୟୁଷିତ କେନ୍ଦୁଝର ବାଂଶପାଳ ବ୍ଲକର ବାରହାଗଡ଼ ପଞ୍ଚାୟତର ନଡ଼ାମ ଗ୍ରାମରେ ।
ଏହି ମହାମାରୀରୁ ସାଧାରଣ ଜନତାଙ୍କୁ ମୁକୁଳାଇବା ପାଇଁ କେନ୍ଦ୍ର ଓ ରାଜ୍ୟ ସରକାର ଭରପୁର ପ୍ରୟାସ ଜାରି ରଖିଛନ୍ତି । ଏଥିପାଇଁ ବ୍ୟାପକ ଜନସଚେତନତା କାର୍ଯ୍ୟକ୍ରମ କରିବା ସହ ସାମାଜିକ ଦୂରତ୍ବ ବଜାୟ ରଖିବା ଓ ପରିଷ୍କାର ପରିଚ୍ଛନ୍ନ ରହିବାକୁ ସଚେତନ କରାଉଛନ୍ତି ।
ଗ୍ରାମର ପ୍ରମୁଖ ରାସ୍ତା ଉପରେ କାଠ ପକାଇ ରାସ୍ତା ଅବରୋଧ କରାଯାଇଥିଲା । ଆଦିମ ଜନଜାତି ଜୁଆଙ୍ଗ ଜନଜାତି ବହୁଳ ଉକ୍ତ ଗ୍ରାମ ହୋଇଥିଲେ ହେଁ ସଚେତନତା ବାର୍ତ୍ତା ଉକ୍ତ ଗ୍ରାମରେ ପହଞ୍ଚିଥିବା ଜଣାପଡିଛି। ପ୍ରଥମେ ଗ୍ରାମର ଯୁବକମାନେ ଅଜଣା ବ୍ୟକ୍ତିଙ୍କୁ ଗ୍ରାମକୁ ପ୍ରବେଶ ନିଷେଧ କହୁଥିବା ଜଣାପଡିଛି ।
ଗ୍ରାମବାସୀ ପ୍ରଥମେ ଦୂରତ୍ବ ରଖି ଏହି ମହାମାରୀରୁ ରକ୍ଷା ପାଇବା ପାଇଁ ସମସ୍ତ ସରକାରୀ ଉପାୟ ଅବଲମ୍ବନ କରୁଥିବା କହିଛନ୍ତି । ସରକାରୀ ସଚେତନତା ବାର୍ତା ପହଁଚିବା ପୂର୍ବରୁ ଇଣ୍ଟରନେଟ ମାଧ୍ୟମରେ ସେମାନେ ଏହି ରୋଗ ବିଷୟରେ ଜାଣି ସଚେତନ ହୋଇଥଲେ। ବାହାରୁ ଘରକୁ ପ୍ରବେଶ କରିବା ମାତ୍ରେ ହାତ ଗୋଡ଼ ଧୋଇବା ସହ ଗରମ ପାଣି ପିଉଥିବା କହିଛନ୍ତି ।
ପୂର୍ବରୁ ଗ୍ରାମରେ ସାମାଜିକ କାର୍ଯ୍ୟକ୍ରମ ବନ୍ଦ କରାଯାଇ ଥିବାବେଳେ ସମସ୍ତଙ୍କ ମଧ୍ୟରେ ସାମାଜିକ ଦୂରତ୍ବ ରଖୁଥିବା ଜଣାପଡିଛି। ସରକାରଙ୍କ ସହ ହାତ ମିଳାଇ କୋରୋନା ମହାମାରୀରୁ ବଞ୍ଚିବା ପାଇଁ ଗ୍ରାମବାସୀ ସମସ୍ତେ ସଂକଳ୍ପ ନେଇଥିବା ପ୍ରକାଶ କରିଛନ୍ତି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
