କେନ୍ଦୁଝର: ଘରୋଇ ଶିକ୍ଷାନୁଷ୍ଠାନର ମନ ଇଚ୍ଛା ଫି ଆଦାୟ ଉପରେ ଅଙ୍କୁଶ ଲଗାଇବାକୁ ଜିଲ୍ଲା କଂଗ୍ରସ ପକ୍ଷରୁ ଦାବି ପତ୍ର । ଏ ସମ୍ପର୍କରେ ଡିସିସି ତରଫରୁ ଜିଲ୍ଲାପାଳଙ୍କ ଠାରେ ଏ ଦାବି ପତ୍ର ପ୍ରଦାନ କରାଯାଇଛି ।
ଦୀର୍ଘ 5 ମାସ ହେବ ଲୋକେ କୋରୋନା ପାଇଁ କାମଧନ୍ଦା ହରାଇବା ସହ ନାନାଦି ଆର୍ଥିକ ସଙ୍କଟରେ ସମ୍ମୁଖୀନ ହେଉଛନ୍ତି । ମାର୍ଚ୍ଚ ମାସ ଠାରୁ ଛାତ୍ରଛାତ୍ରୀ ବିଦ୍ୟାଳୟ ବା ମହାବିଦ୍ୟାଳୟ ମାଡି ନାହାଁନ୍ତି । ଏଭଳି ସ୍ଥିତିରେ ମାସେ ଦେଢ଼ ମାସ ହେବ ସ୍କୁଲ ଗୁଡିକରେ ଅନଲାଇନ ଶିକ୍ଷା ଦିଆଯାଉଛି ।
ସେପଟେ, ପ୍ରାୟ 60 ଭାଗ ପିଲାଙ୍କ ପାଖରେ ସ୍ମାର୍ଟ ଫୋନ କିମ୍ବା ଲାପଟପ ନାହିଁ । ତେଣୁ ଅନଲାଇନ ଶିକ୍ଷା ଫଳପ୍ରଦ ହେଉନଥିବା କଂଗ୍ରେସ ପକ୍ଷରୁ ଅଭିଯୋଗ ହୋଇଛି । ଏପରି ସ୍ଥିତି ଘରୋଇ ଶିକ୍ଷାଅନୁଷ୍ଠାନ ଗୁଡିକ ସରକାରୀ ତାଗିଦକୁ ବେଖାତିର କରି ମାସକୁ ମାସ ମନଇଚ୍ଛା ଫି ଦାଖଲ କରିବାକୁ ବାଧ୍ୟ କରୁଛନ୍ତି ।
ଯାହାକୁ ନେଇ ଛାତ୍ରଛାତ୍ରୀ ଓ ସେମାନଙ୍କ ଅଭିଭାବକଙ୍କ ଉପରେ କୋରୋନା ମହାମାରୀ ଚାପ ସାଙ୍ଗକୁ ଘରୋଇ ଶିକ୍ଷାନୁଷ୍ଠାନ ଗୁଡିକର ଆର୍ଥିକ ଚାପ କଷ୍ଟ ଦାୟକ ହେଉଛି । ତେଣୁ ସମ୍ପୃକ୍ତ ଶିକ୍ଷାନୁଷ୍ଠାନ ଗୁଡିକ ଅନ୍ତତଃ 4 ମାସର ଫି’ ଛାଡ କରିବା ସହ ମନ ଇଚ୍ଛା ଫି’ ଆଦାୟ ଉପରେ ଅଙ୍କୁଶ ଲଗାଇବାକୁ ଦାବି ପତ୍ରରେ ଜଣାଇଛନ୍ତି । ଏହି ଦାବିପତ୍ର ପ୍ରଦାନ ସମୟରେ ପିସିସି ସାଧାରଣ ସମ୍ପାଦକ ଆଲୋକ ମିଶ୍ର ସମେତ ବହୁ କଂଗ୍ରେସ ନେତା ତଥା କର୍ମୀ ଉପସ୍ଥିତ ଥିଲେ ।
କେନ୍ଦୁଝରର ସନ୍ତୋଷ ମହାପାତ୍ର, ଇଟିଭି ଭାରତ
