କେନ୍ଦୁଝର: ବଡବିଲରେ ବାଇପାସ ରାସ୍ତା ନିର୍ମାଣ ପାଇଁ ସିଭିଲ ସୋସାଇଟି ପକ୍ଷରୁ ଧାରଣା ଦିଆହୋଇଛି । ବାରମ୍ବାର ଅଭିଯୋଗ କରିବା ପରେ ବି ପ୍ରଶାସନର ନିଦ ନ ଭାଙ୍ଗିବାରୁ ଧାରଣାକୁ ଓହ୍ଲାଇଛି ସୋସାଇଟି ।
ଭଲ ରାସ୍ତା ଖଣ୍ଡେ ବଡବିଲବାସୀଙ୍କ ପାଇଁ ସ୍ୱପ୍ନ ହୋଇଛି । ବିପର୍ଯ୍ୟୟ ସଡକ ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ । ଦୈନିକ ଶହ ଶହ ସଂଖ୍ୟାରେ ଟ୍ରକ୍ ଟିପର୍ ଓ ବଡ଼ବଡ଼ ଟ୍ରେଲର ଗାଡ଼ି ଚଳାଚଳ ଯୋଗୁଁ ଧୂଳିଧୂଆଁର ମାତ୍ରାଧିକ ପ୍ରଦୂଷଣରେ ଅତିଷ୍ଠ ହୋଇପଡ଼ିଛନ୍ତି ସହରବାସୀ । ଏଥିସହ ଟ୍ରାଫିକ୍ ଜାମ୍ ଏକ ପ୍ରମୁଖ ସମସ୍ୟା ପାଲଟିଛି । ପ୍ରତିଦିନ କିଛି ନା କିଛି ଦୁର୍ଘଟଣା ଘଟି ଲୋକଙ୍କ ପ୍ରାଣହାନୀ ଘଟୁଛି । ଇତି ମଧ୍ୟରେ ବାଇପାସ ରିଙ୍ଗ ରୋଡ ନିର୍ମାଣ ପାଇଁ ପ୍ରଶାସନ ପାଖରେ ବାରମ୍ବାର ଲିିଖିତ ଅଭାଯୋଗ କଲା ପରେ ବି କିଛି ସୁଫଳ ମିଳିଲା ନିହିଁ । ନଅ ମାସ ତଳେ ଏ ନେଇ ଜିଲ୍ଲାପାଳଙ୍କ ସହ ବୈଠକ ମଧ୍ୟ ହୋଇଥିଲା ହେଲେ ଖାଲି ପ୍ରତିଶୃତି ବାଇପାସ୍ ରିଙ୍ଗ୍ ରୋଡ୍ ନିର୍ମାଣ କାର୍ଯ୍ୟ ଆରମ୍ଭ ହୋଇପାରିଲା ନାହିଁ । ପଦଯାତ୍ରାଠାରୁ ଆରମ୍ଭ କରି ବିଭିନ୍ନ ସମୟରେ ଧାରଣା ପ୍ରଦର୍ଶନ କରି ଦାବି ଉପସ୍ଥାପନା କରାଯାଇଥିଲା ହେଲେ କିଛି ଫଳ ମିଳିଲା ନାହିଁ ।
ତେଣୁ ଜିଲ୍ଲା ପ୍ରଶାସନକୁ ଚେତାଇବା ପାଇଁ ଆଜି ଗାନ୍ଧି ଜୟନ୍ତୀ ଅବସରରେ ମଧୁସୂଦନ ଛକଠାରେ ସିଭିଲ ସୋସାଇଟିର ପକ୍ଷରୁ ୩ ଘଣ୍ଟା ଧାରଣା ପ୍ରଦର୍ଶନ ହୋଇଛି । ଯଦି ରାସ୍ତା ନିର୍ମାଣ କାର୍ଯ୍ୟ ଜଲଦି ଆରମ୍ଭ ନହୁଏ ଆଗାମୀ ଦିନରେ ଜୋରଦାର ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛି ବଡବିଲ ସିଭିଲ ସୋସାଇଟି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର,ଇଟିଭି ଭାରତ
