କେନ୍ଦୁଝର: ସୋମବାର ଜିଲ୍ଲାର ସହରମାନଙ୍କରେ ବିଜୁ ଜନତା ଦଳ ପକ୍ଷରୁ କୋରୋନା ମହାମାରୀରୁ ରକ୍ଷା ପାଇବା ପାଇଁ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମରେ ଦଳର ଶତାଧିକ କର୍ମୀମାନେ ଯୋଗ ଦେଇ ସହର ପରିକ୍ରମା କରିଥିଲେ ।
କୋରୋନା ମହାମାରୀ ସମଗ୍ର ବିଶ୍ବରେ ଚିନ୍ତାର କାରଣ ପାଲଟିଛି । ମହାମାରୀ ଆକ୍ରାନ୍ତ ହୋଇ ଅକାଳରେ ଲୋକମାନେ ମୃତ୍ୟୁବରଣ କରୁଛନ୍ତି । କୋରୋନା ସଂକ୍ରମଣକୁ ରୋକିବା ପାଇଁ ବିଭିନ୍ନ ଦେଶରେ ସରକାର ଗାଇଡଲାଇନ ଜାରି କରିବା ସହିତ ସଚେତନତା କାର୍ଯ୍ୟକ୍ରମ ମଧ୍ୟ କରୁଛନ୍ତି । ଶୀତ ଦିନରେ କୋରୋନାର 2ୟ ଫେଜ ସଂକ୍ରମଣ ସୃଷ୍ଟି ହେବାର ସମ୍ଭାବନା ରହିଛି ବୋଲି ରାଜ୍ୟ ସରକାରଙ୍କ ପକ୍ଷରୁ ସୂଚନା ମିଳିଛି । ଏହା ପରେ କେନ୍ଦୁଝର ଜିଲ୍ଲାରେ ଲୋକମାନଙ୍କୁ ସଚେତନ କରାଇବା ପାଇଁ ବିଜୁ ଜନତା ଦଳ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ କରିଛି ।
ଏହି କାର୍ଯ୍ୟକ୍ରମରେ ଦଳର ଶତାଧିକ କର୍ମଚାରୀ ଯୋଗ ଦେଇ ସ୍ଥାନୀୟ ବିଜୁ ପଟ୍ଟନାୟକ ଛକ ନିକଟରୁ ହାତରେ ମାସ୍କ ଓ ସାନିଟାଇଜର ଧରି ସହର ପରିକ୍ରମା କରିଥିଲେ । ମାସ୍କ ବ୍ୟବହାର କରୁନଥିବା ଲୋକମାନଙ୍କୁ ମାସ୍କ ଓ ସାନିଟାଇଜର ବଣ୍ଟନ କରିଥିଲେ । ଏହି ସଚେତନତା ଅଭିଯାନ ସହ ଦଳ ପକ୍ଷରୁ ରକ୍ତଦାନ ଶିବିର ମଧ୍ୟ ଚାଲୁ ରହିଥିବା ସୂଚନା ମିଳିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
