କେନ୍ଦୁଝର: ରାଜ୍ୟରେ 2 ଟି ପର୍ଯ୍ୟାୟରେ ମତଦାନ ଶେଷ ହୋଇଥିବା ବେଳେ ତୃତୀୟ ପର୍ଯ୍ୟାୟ ମତଦାନ ପାଇଁ ରହିଲା ଆଉ ମାତ୍ର 2 ଦିନ । ତୃତୀୟ ପ୍ରଯ୍ୟାୟ ନିର୍ଵାଚନର ପ୍ରଚାର ପାଇଁ ଆଜି ଥିଲା ଶେଷ ଦିନ । ଏନେଇ ଜୋରସୋରରେ ଚାଲିଛି ପ୍ରଚାର । କେନ୍ଦୁଝର ସହରରେ ପୂର୍ବରୁ ବିଜେପି ଓ କଂଗ୍ରେସ ନିଜର ଦଳୀୟ ପ୍ରଚାର ସାରିଥିବା ବେଳେ ବିଜେଡି ଏଥିରୁ ବାଦ୍ ପଡିଥିଲା । ତେବେ ପ୍ରଚାରର ଶେଷ ଦିନରେ ମୋଟର ସାଇକେଲ ଶୋଭାଯାତ୍ରା କରି ଦମ ଦେଖାଇଛି ବିଜେଡି ।
ସଦର ନିର୍ଵାଚନ ମଣ୍ଡଳୀ ପାଇଁ ମୋଟର ସାଇକେଲ ଶୋଭାଯାତ୍ରା କରି ବିଜେଡି ନିଜର ଦଳୀୟ ପ୍ରଚାର କରିଥିଲା । ଏଥିରେ ଏକ ହଜାରରୁ ଉର୍ଦ୍ଧ୍ବ ବାଇକ ସାମିଲ ହୋଇଛି । ସ୍ଥାନୀୟ ପୁରୁଣା ସହରରୁ ଏହି ମେଗା ମୋଟର ସାଇକେଲ ଶୋଭାଯାତ୍ରା ବାହାରି କେନ୍ଦୁଝର ସହର ପରିକ୍ରମା କରି ଝୁମ୍ପୁରା ପର୍ଯ୍ୟନ୍ତ ଯାଇଥିଲା । ତେବେ ଏହି ଶୋଭାଯାତ୍ରାର ମୁଖ୍ୟ ଆକର୍ଷଣ ପାଲଟିଥିଲେ ଓଡ଼ିଆ ସିନେ ତାରକା ଶୀତଳ ପାତ୍ର ।
ଏଥିରେ କେନ୍ଦୁଝରର ବିଜେଡି ବିଧାୟକ ପାର୍ଥୀ ମାଧବ ସର୍ଦ୍ଦାର, ସାଂସଦ ପାର୍ଥୀ ଚନ୍ଦ୍ରାଣୀ ମୁର୍ମୁଙ୍କ ସହ ଶହଶହ ଯୁବ ବିଜେଡି କର୍ମୀ ସାମିଲ ହୋଇଥିଲେ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
