କେନ୍ଦୁଝର: ବିପର୍ଯ୍ୟସ୍ତ ଅବସ୍ଥାରେ ବଡବିଲ ସହରର ମୁଖ୍ୟ ରାସ୍ତା । ଧୂଳି ଓ ଧୂଆଁ ପ୍ରଦୂଷଣରେ ଅଣନିଶ୍ବାସୀ ଲୋକେ । ସହରରେ ବଢୁଥିବା ଏହି ପ୍ରଦୂଷଣରେ ଲୋକେ ବିଭିନ୍ନ ରୋଗରେ ପୀଡିତ ହେଉଥିବାର ଅଭିଯୋଗ ହୋଇଛି । ହେଲେ ବାରମ୍ବାର ଅଭିଯୋଗ ଓ ପ୍ରତିବାଦ ପରେ ନୀରବଦ୍ରଷ୍ଟା ପ୍ରଶାସନ । ଶେଷରେ ବାଧ୍ୟ ହୋଇ ପୋଷ୍ଟକାର୍ଡ ମାଧ୍ୟମରେ ରାଜ୍ୟ ମୁଖିଆଙ୍କୁ ନିଜ ଦୁଃଖ ଜଣାଇବାକୁ ବାହାରିଛନ୍ତି ଲୋକେ । ବଡବିଲ୍ ସିଭିଲ ସୋସାଇଟିର ଆହ୍ବାନ କ୍ରମେ ପାଖପାଖି 1 ହଜାର ପୋଷ୍ଟକାର୍ଡରେ ନିଜ ଅଭିଯୋଗ ଲିପିବଦ୍ଧ କରି ମୁଖ୍ୟମନ୍ତ୍ରୀଙ୍କୁ ପଠାଇଛନ୍ତି ବଡବିଲବାସୀ ।
ସୂଚନାନୁସାରେ, କିରିବୁରୁ ଛକ ଠାରୁ ନାଲଦା ପର୍ଯ୍ୟନ୍ତ ଯାଇଥିବା ରାଜ୍ୟ ରାଜପଥର ବିଭିନ୍ନ ସ୍ଥାନରେ ବଡ଼ବଡ଼ ଗର୍ତ୍ତମାନ ସୃଷ୍ଟି ହୋଇଛି । ବିଶେଷକରି ହରିଓମ୍ ଭବନ ନିକଟ ରାସ୍ତା, ବାଇପାସ ରୋଡ୍, ବସଷ୍ଟାଣ୍ଡ ଠାରୁ ଷ୍ଟେଟବ୍ୟାଙ୍କ୍ ଦେଇ ପାଲ ହାଇଟ୍ ପର୍ଯ୍ୟନ୍ତ ପୁରା ରାସ୍ତା ଖାଲଖମାରେ ଭରି ରହିଛି । ଏହି ରାସ୍ତା ଦେଇ ଯାତାୟତ କରିବା ବିପଦପୂର୍ଣ୍ଣ ହୋଇପଡିଛି । ତେବେ ଖରାପ ରାସ୍ତା ସହ ସହର ଭିତର ଦେଇ ଯାତାୟତ କରୁଥିବା ହଜାର ହଜାର ସଂଖ୍ୟାର ଭାରିଯାନ ଯୋଗୁଁ ଲୋକେ ନାହିଁ ନଥିବାର ଅସୁବିଧା ସମ୍ମୁଖୀନ ହେଉଛନ୍ତି । ବିଭିନ୍ନ ସମୟରେ ସଡକ ଦୁର୍ଘଟଣା ଘଟି ଜୀବନହାନି ଘଟୁଛି । ଅନେକ ସମୟରେ ଟ୍ରାଫିକ୍ ଜାମ ଯୋଗୁଁ ଛାତ୍ରଛାତ୍ରୀଙ୍କୁ ସ୍କୁଲ ପହଞ୍ଚିବା କାଠିକର ପାଠ ହୋଇପଡିଥାଏ । ସେପଟେ ସହରର ଏହି ଟ୍ରାଫିକ୍ ଭିଡକୁ ନିୟନ୍ତ୍ରଣ କରିବାରେ ଫେଲ ମାରିଛି ପ୍ରଶାସନ ।
ପ୍ରଶାସନର ଏଭଳି ବେପରୁଆ ନୀତିରେ କ୍ଷୁବ୍ଧ ବଡବିଲ ବାସୀ ସିଧାସଳଖ ମୁଖ୍ୟମନ୍ତ୍ରୀଙ୍କୁ ଏସମ୍ପର୍କରେ ଅବଗତ କରିବାକୁ ନିଷ୍ପତ୍ତି ନେଇଥିଲେ । ପୋଷ୍ଟକାର୍ଡ ମାଧ୍ୟମରେ ନିଜ ଅଭିଯୋଗ ଲିପିବଦ୍ଧ କରି ମୁଖ୍ୟମନ୍ତ୍ରୀଙ୍କୁ ପଠାଇବା ସହ ଯଥାଶୀଘ୍ର ଏହି ସମସ୍ୟାର ସମାଧାନ ନିମନ୍ତେ ଉପଯୁକ୍ତ ପଦକ୍ଷେପ ଗ୍ରହଣ କରିବାକୁ ଗୁହାରି କରିଛନ୍ତି । 15 ଦିନ ମଧ୍ୟରେ ଏହି ସମସ୍ୟାର ସମାଧାନ ପାଇଁ ପଦକ୍ଷେପ ନ ନିଆଗଲେ, ଆଗକୁ ଚରମ ପଦକ୍ଷେପ ନିଆଯିବ ବୋଲି ସିଭିଲ ସୋସାଇଟି ତରଫରୁ ଚେତାବନୀ ଦିଆଯାଇଛି । ବଡବାସୀଙ୍କ ଏହି ଅଭିଯାନରେ ସାମିଲ ହୋଇଛନ୍ତି ପଦ୍ମଶ୍ରୀ ତୁଳସୀ ମୁଣ୍ଡା । ସେ ମଧ୍ୟ ପୋଷ୍ଟକାର୍ଡରେ ବିପର୍ଯ୍ୟସ୍ତ ରାସ୍ତା ନିର୍ମାଣ ପାଇଁ ମୁଖ୍ୟମନ୍ତ୍ରୀଙ୍କୁ ଦାବି କରିଛନ୍ତି । ସେପଟେ ପୂର୍ତ୍ତ ବିଭାଗ ପକ୍ଷରୁ କାମଚଳା ମରାମତି ଆରମ୍ଭ ହୋଇଛି । କେତେକ ସ୍ଥାନରେ ସିମେଣ୍ଟ୍ କଂକ୍ରିଟ୍ କରାଯାଇ ଖାଲଖମାକୁ ଭର୍ତ୍ତି କରିବାକୁ ଚେଷ୍ଟା କରାଯାଇଛି । ତେବେ ଏହି ରାସ୍ତାର ସ୍ଥାୟୀ ମରାମତି କରାନଗଲେ ଆଗକୁ ସ୍ଥିତି ସଙ୍ଗୀନ ହେବାର ଆଶଙ୍କା ରହିଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
