କେନ୍ଦୁଝର: ଦିନକୁ ଦିନ ସହରରେ ସ୍ଥାନ ନେଉଛି କଂକ୍ରିଟ ଜଙ୍ଗଲ । ସେପଟେ ଶୁଦ୍ଧ ପବନ ପାଇଁ ସହର ମଧ୍ୟରେ କୃତ୍ରିମ ପରିବେଶ ଉଦ୍ୟାନମାନ ସୃଷ୍ଟି କରାଯାଉଛି । ଏଥିପାଇଁ ଖର୍ଚ୍ଚ ହେଉଛି ଲକ୍ଷ ଲକ୍ଷ ଟଙ୍କା ।
କେନ୍ଦୁଝର ପରି ବଣପାହାଡ଼ ଘେରା ଜିଲ୍ଲାରେ ଏହି ଟଙ୍କା ଯେପରି ଧର୍ମକୁ ଆଖିଠାର ଭଳି ଲାଗୁଛି । କେନ୍ଦୁଝର ପୌରପାଳିକା ୨୦୧୭ ମସିହାରେ ଡିଏମଏଫ ରୁ 15 ଲକ୍ଷ ଟଙ୍କା ବ୍ୟୟ କରି ସହର ମଧ୍ୟସ୍ଥଳୀରେ ଏକ ପରିବେଶ ଉଦ୍ୟାନ ସୃଷ୍ଟି କରିଥିଲେ । କିନ୍ତୁ ଏହି ପରିବେଶ ଉଦ୍ୟାନ ଉଦଘାଟନ ହେବା ପର ଠାରୁ ଆସିନାହିଁ ଲୋକଙ୍କ ବ୍ୟବହାରରେ । କାରଣ ଉଦ୍ୟାନ ଫାଟକରେ ଝୁଲୁଛି ତାଲା ।
ଏହି ଉଦ୍ୟାନ ମଧ୍ୟରେ ନିତିଦିନ ବ୍ୟାୟାମ ଜିନିଷ ସାଙ୍ଗକୁ ଚାଲିବା ପାଇଁ ଫୁଟପାଥ ମଧ୍ୟ ନିର୍ମାଣ କରାଯାଇଥିଲା । ଏହା ସହ ବହୁ ମୂଲ୍ୟବାନ ବୃକ୍ଷ ମଧ୍ୟ ରୋପଣ କରଯାଇଥିଲା । ଏହି ପାର୍କ ବନ୍ଦ ହେବା ଯୋଗୁଁ ଏହି ମୂଲ୍ୟବାନ ବୃକ୍ଷ ସାଙ୍ଗକୁ ବ୍ୟାୟାମ ଜିନିଷ ସବୁ ନଷ୍ଟ ହୋଇଗଲାଣି । ସହର ମଧ୍ୟରେ କିଛି ବୟସ୍କ ଲୋକଙ୍କ ପାଇଁ ଚାଲିବା ପାଇଁ ପାର୍କ ନଥିବାରୁ ଏହି ପାର୍କ ଆଶା ସଞ୍ଚାର କରିଥିଲା । କିନ୍ତୁ ଏହା ବନ୍ଦ ଥିବାରୁ ସେମାନେ ନିରାଶ ହୋଇଛନ୍ତି ।
ଏହି ପାର୍କକୁ ଯଥାଶୀଘ୍ର ଖୋଲିବାକୁ ଦାବି କରିଛନ୍ତି ପୂର୍ବତନ କାଉନସିଲର। ଏନେଇ ପୌରନିର୍ବାହୀ ଅଧିକାରୀଙ୍କୁ ପଚାରିବାରୁ ଏହି ପାର୍କ ମଧ୍ୟରେ ଏକ ଅତ୍ୟାଧୁନିକ ଶୌଚାଳୟ ନିର୍ମାଣ କରାଯାଉଛି । ଏହି ଶୌଚାଳୟ ନିର୍ମାଣ ପରେ ଏହାକୁ ଖୋଲି ଦିଆଯିବ ବୋଲି ପ୍ରକାଶ କରିଛନ୍ତି।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
