ଆଦିବାସୀ ମହିଳାଙ୍କ ପାଇଁ ଆତ୍ମନିର୍ଭରଶୀଳତାର ଉଦାହରଣ ‘ଅନିତା ମହାନ୍ତି’

ଅନିତା ପ୍ରଥମେ ଜଣେ ଗୃହିଣୀ ଥିଲେ । ଏପରି ଘରେ ବସିଥିବାବେଳେ ୟୁଟ୍ୟୁବରେ ମହିଳାମାନେ କିପରି ଅଗରବତୀ ତିଆରି କରି ନିଜେ ରୋଜଗାରକ୍ଷମ ହୋଇପାରୁଛନ୍ତି ଦେଖିଲେ । ଏହାପରେ ସ୍ବାମୀଙ୍କ ସହଯୋଗରେ ଜିଲ୍ଲା ଶିଳ୍ପ କେନ୍ଦ୍ର ସହ ଯୋଗାଯୋଗ କରି ଅଗରବତୀ ଫ୍ୟାକ୍ଟ୍ରି ଗଢିବା ପାଇଁ ସରକାରୀ ସହାୟତା ପାଇଥିଲେ ।

କେନ୍ଦୁଝର: ମହିଳା ଆଉ ଘର କୋଣରେ ସୀମିତ ହୋଇ ରହି ନାହିଁ । ସିଏ ବି ଆଜି ଘରୁ ବାହାରି ଅଫିସ ସମ୍ଭାଳିବା ସହ ଚନ୍ଦ୍ରପୃଷ୍ଠରେ ପାଦ ଥାପିବାରେ ସଫଳ ହୋଇଛି । ଆଜିର ମହିଳା କୌଣସି କ୍ଷେତ୍ରରେ ପୁରୁଷଙ୍କଠାରୁ ପଛରେ ହୋଇ ରହିନାହାଁନ୍ତି । ମହିଳା ଆଜି ନିଜେ ସ୍ବାବଲମ୍ବୀ ହେବା ସହ ଅନ୍ୟକୁ ମଧ୍ୟ କରିପାରୁଛନ୍ତି ଆତ୍ମନିର୍ଭରଶୀଳ । ଏପରି ଜଣେ ସ୍ବାବଲମ୍ବୀ ମହିଳା ହେଉଛନ୍ତି କେନ୍ଦୁଝର ଜିଲ୍ଲାର ସଫଳ ଉଦ୍ୟୋଗୀ ଅନିତା ମହାନ୍ତି ।

ପୁରୁଷ ପ୍ରଧାନ ସମାଜରେ ମହିଳାମାନେ ଏବେ ନିଜେ ଘରୁ ଗୋଡ଼ କାଢି ସ୍ବାବଲମ୍ବୀ ହେଇପାରୁଛନ୍ତି । ନିଜେ ଉଦ୍ୟମରେ ଉଦ୍ୟୋଗ ମଧ୍ୟ ଗଢି ଅନ୍ୟକୁ ରୋଜଗାରକ୍ଷମ କରିପାରୁଛନ୍ତି । ମହିଳାଙ୍କୁ ଏକ୍ଷେତ୍ରରେ ଆଗକୁ ବଢ଼ିବାରେ ସରକାର ମଧ୍ୟ ସହଯୋଗର ହାତ ବଢେଇଛନ୍ତି । ଘର ହାଣ୍ଡିଶାଳରୁ ସଫଳ ଉଦ୍ୟୋଗୀ ହୋଇ ପାରିଛନ୍ତି କେନ୍ଦୁଝର ସହରର ଅନିତା ମହାନ୍ତି । ଅନିତା ଏକ ଅଗରବତୀ ଫ୍ୟାକ୍ଟ୍ରି କରି ନିଜେ ସ୍ବାବଲମ୍ବୀ ହେବା ସହ 15ରୁ ଊର୍ଦ୍ଧ୍ବ ମହିଳାଙ୍କୁ ରୋଜଗାରକ୍ଷମ କରିପାରିଛନ୍ତି ।

ଅନିତା ପ୍ରଥମେ ଜଣେ ଗୃହିଣୀ ଥିଲେ । ଏପରି ଘରେ ବସିଥିବାବେଳେ ୟୁଟ୍ୟୁବରେ ମହିଳାମାନେ କିପରି ଅଗରବତୀ ତିଆରି କରି ନିଜେ ରୋଜଗାରକ୍ଷମ ହୋଇପାରୁଛନ୍ତି ଦେଖିଲେ । ଏହାପରେ ସ୍ବାମୀଙ୍କ ସହଯୋଗରେ ଜିଲ୍ଲା ଶିଳ୍ପ କେନ୍ଦ୍ର ସହ ଯୋଗାଯୋଗ କରି ଅଗରବତୀ ଫ୍ୟାକ୍ଟ୍ରି ଗଢିବା ପାଇଁ ସରକାରୀ ସହାୟତା ପାଇଥିଲେ । ଶିଳ୍ପକେନ୍ଦ୍ର ସହାୟତାରେ ତାଲିମ ପାଇବା ପରେ ଅଗରବତୀ ତିଆରି କରିବା ଆରମ୍ଭ କରିଥିଲେ । ପ୍ରଥମେ ଗୋଟିଏ ମେସିନ ପକାଇ ମାତ୍ର ଦୁଇ-ତିନି ଜଣ ବେରୋଜଗାର ମହିଳାଙ୍କୁ ନେଇ ଆରମ୍ଭ କରିଥିବା ଫ୍ୟାକ୍ଟ୍ରିରେ ଏବେ 15ରୁ ଊର୍ଦ୍ଧ୍ବ ମହିଳାଙ୍କ ପରିବାରରେ ହସ ଫୁଟାଇ ପାରିଛନ୍ତି ଅନିତା ।

ପୂର୍ବରୁ ଅଗରବତୀ ସାମାନ୍ୟ ପ୍ୟାକ କରି ବିକୁଥିବାବେଳେ ବର୍ତ୍ତମାନ ଚାହିଦା ବଢିବାରୁ ବୈତରଣୀର ଉତ୍ପତ୍ତିସ୍ଥଳ ‘ଗୁପ୍ତଗଙ୍ଗା’ ନାମରେ ଅଗରବତୀ ବିକ୍ରି କରୁଛନ୍ତି । ଏହି ଗୁପ୍ତଗଙ୍ଗା ଅଗରବତୀ ବର୍ତ୍ତମାନ କେନ୍ଦୁଝର ଜିଲ୍ଲା ସହ ଅନ୍ୟ ପାଞ୍ଚରୁ ଊର୍ଦ୍ଧ୍ବ ଜିଲ୍ଲାମାନଙ୍କରେ ବିକ୍ରି ହେଉଛି । ଅନିତା ଏହି ଅଗରବତୀ ଫ୍ୟାକ୍ଟ୍ରିର ଅଗରବତୀ ତିଆରି କରିବାଠାରୁ ମାର୍କେଟିଂ ପର୍ଯ୍ୟନ୍ତ ସମସ୍ତ କାର୍ଯ୍ୟ ନିଜେ ତୁଲାଇଥାନ୍ତି ।

ପାଞ୍ଚ ଲକ୍ଷ ଟଙ୍କାର ସରକାରୀ ସହାୟତାରେ ଆରମ୍ଭ ହୋଇଥିବା ଏହି ଫ୍ୟାକ୍ଟ୍ରି ବର୍ତ୍ତମାନ ବାର୍ଷିକ ପାଞ୍ଚ ଲକ୍ଷରୁ ଊର୍ଦ୍ଧ୍ବ ଟଙ୍କା ଲାଭ ପାଇପାରୁଛି । ଏହି ଅଗରବତୀ ଫ୍ୟାକ୍ଟ୍ରିରେ କାର୍ଯ୍ୟ କରି ବହୁ ଗୃହିଣୀ ନିଜେ ପରିବାର ପାଇଁ ଆର୍ଥିକ ସାହାଯ୍ୟ ଯୋଗାଇବାରେ ସକ୍ଷମ ହୋଇପାରିଛନ୍ତି । ଆଦିବାସୀ ବହୁଳ ଏହି ଜିଲ୍ଲାରେ ଅନିତା ଆଗାମୀ ଦିନରେ ଦୁଇ ଶହରୁ ଊର୍ଦ୍ଧ୍ବ ମହିଳାଙ୍କୁ ରୋଜଗାରକ୍ଷମ କରିବାକୁ ଲକ୍ଷ୍ୟ ରଖିଛନ୍ତି । ସ୍ବାବଲମ୍ବୀ ଅନିତାଙ୍କୁ ଜିଲ୍ଲା ଶିଳ୍ପ କେନ୍ଦ୍ର ବହୁ ବାଣିଜ୍ୟମେଳା ଆଦିରେ ସୁଯୋଗ ଦେଇ ତାଙ୍କୁ ଅଧିକ ସ୍ବାବଲମ୍ଵନ କରିବାରେ ସହାୟକ ହେଉଛି ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ