କେନ୍ଦୁଝର: ଆସନ୍ତା 22ରୁ ମାଟ୍ରିକ ପରୀକ୍ଷା । କେନ୍ଦୁଝର ଜିଲ୍ଲାର ୨୩,୨୩୩ ଜଣ ରେଗୁଲାର ଓ ୧,୨୨୧ ଜଣ ଏକ୍ସ-ରେଗୁଲାର ଛାତ୍ରଛାତ୍ରୀ ଏଥର ପରୀକ୍ଷା ଦେବେ । ୧୨୩ଟି କେନ୍ଦ୍ରରେ ପରୀକ୍ଷା ଦେବେ ପରୀକ୍ଷାର୍ଥୀ । ପରୀକ୍ଷାର୍ଥୀ କିଭଳି ଶାନ୍ତିଶୃଙ୍ଖଳ ସହ ପରୀକ୍ଷା ଦେଇପାରିବେ ସେନେଇ ପ୍ରଶାସନିକ ସ୍ତରରେ ଆଲୋଚନା ଚାଲିଛି ।
ଦେହୁରିପଶି, କାଞ୍ଜିପାଣି ଓ ଘଟଗାଁ ବାଳିକା ଉଚ୍ଚ ବିଦ୍ୟାଳୟର ୩ଟି କେନ୍ଦ୍ରରେ ସିସିଟିଭି କ୍ୟାମେରା ଲାଗିବାକୁ ନିଷ୍ପତ୍ତି ନିଆଯାଇଛି । ଏଥିସହ କେତେକ ପରୀକ୍ଷା କେନ୍ଦ୍ରର ନିର୍ଦ୍ଧାରଣ ହୋଇନଥିବା ଜଣାପଡ଼ିଛି । ପରୀକ୍ଷା କେନ୍ଦ୍ରକୁ ମୋବାଇଲ ଫୋନ ନେବା ଉପରେ ମଧ୍ୟ କଟକଣା ଲାଗୁ କରାଯାଇଛି । ୧୩ଟି ବ୍ଲକ ପାଇଁ ୧୧ଟି ନୋଡାଲ ସେଣ୍ଟରରେ ପ୍ରଶ୍ନପତ୍ର ରଖିବା ବ୍ୟବସ୍ଥା ହୋଇଛି ।
ସେପଟେ, ପ୍ରଶ୍ନପତ୍ର ସିଧାସଳଖ ପରୀକ୍ଷା କେନ୍ଦ୍ରକୁ ଯିବ ବୋଲି ଜଣାପଡିଛି । କପି ନିୟନ୍ତ୍ରଣ କରିବା ପାଇଁ ବିଭାଗୀୟ ଓ ପ୍ରଶାସନିକ ସ୍କ୍ବାଡ୍ ଗଠନ କରାଯିବ । ଏନେଇ କେନ୍ଦ୍ର ନିରୀକ୍ଷଣ ଦାୟିତ୍ବରେ ଥିବା ପ୍ରଧାନଶିକ୍ଷକଙ୍କ ବୈଠକରେ ବିସ୍ତୃତ ଆଲୋଚନା ହୋଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
