କେନ୍ଦୁଝର: କେନ୍ଦୁଝର ହରିଚନ୍ଦନପୁର ଥାନା ଅନ୍ତର୍ଗତ ଶଗଡପଟା ଛକ ନିକଟରେ ବାଇକକୁ ପଛପଟୁ ଧକ୍କା ଦେଲା ପିକଅପ ଭ୍ୟାନ । ଦୁର୍ଘଟଣାରେ ବାଇକ ଆରୋହୀଙ୍କ ମୃତ୍ୟୁ ଘଟିଥିବା ବେଳେ ପିକଅପ ଭ୍ୟାନଟି ରାସ୍ତା କଡକୁ ଓଲଟି ପଡିଥିଲା ଓ ଉତ୍ୟକ୍ତ ଲୋକେ ରାସ୍ତା ଅବରୋଧ କରିଥିଲେ । ଖବର ଅନୁଯାୟୀ ଶନିବାର ସନ୍ଧ୍ୟା ସମୟରେ (ଓଡି ୦୨ ୨ଟି ୦୯୩୭) ନମ୍ବର ପିକଅପ ଭ୍ୟାନଟି ବାଇକ୍ ପଛରେ ଧକ୍କା ଦେଇଥିଲା ।
ପିକଅପ ଭ୍ୟାନଟି ଗାଡ଼ିଟି ଦୈତାରୀ ଅଭିମୁଖେ ଯାଉଥିଲା । ବାଇକ ଯୋଗେ ଶଗଡପଟା ଗ୍ରାମର ରାଜକିଶୋର ନାଏକ ଭଗାମୁଣ୍ଡା ଠାରୁ ଘରକୁ ଫେରୁଥିବା ବେଳେ ଏହି ଦୁର୍ଘଟଣା ଘଟିଥିବାର ଜଣାପଡ଼ିଛି । ଦୁର୍ଘଟଣା ପରେ ଉତ୍ୟକ୍ତ ଲୋକମାନେ ପିକପ୍ ଭ୍ୟାନ ଡ୍ରାଇଭର ତନ୍ମୟ ମହାନ୍ତକୁ ମାଡ଼ ମାରିବା ସହ ବାନ୍ଧିଥିଲେ ।
ରାଜକିଶୋରକୁ ଗୁରୁତର ଅବସ୍ଥାରେ କଟକରୁ ଆସୁଥିବା ଏକ ଆମ୍ବୁଲାନ୍ସ ଯୋଗେ ହରିଚନ୍ଦନପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଦୁର୍ଘଟଣା ଘଟାଇଥିବା ପିକଅପ ଭ୍ୟାନଟି ଯଶିପୁର ଅଞ୍ଚଳର ମିନକେତନ ସେଠୀଙ୍କ ନାମରେ ରହିଛି ବୋଲି ଜଣାପଡିଛି ।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ସମ୍ପୃକ୍ତ ଗାଡିଗୁଡିକୁ ଜବତ କରିବା ସହ ଉତ୍ୟକ୍ତ ଲୋକମାନଙ୍କୁ ବୁଝାସୁଝା କରିଥିଲେ । ଏହାସହ ଡ୍ରାଇଭରଙ୍କୁ ପୋଲିସ ହେପାଜତରେ ଦେଇଥିଲେ ଓ ରାସ୍ତା ଅବରୋଧ ହଟିଥିବାର ଜଣାପଡ଼ିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
