କେନ୍ଦୁଝର: ବିଭିନ୍ନ ଜଙ୍ଗଲରେ କେନ୍ଦୁଝର ବନଖଣ୍ଡ ତେଲକୋଇ ରେଞ୍ଜ ପକ୍ଷରୁ ଚଢାଉ । ସାମନାଳୀ-କୋଇଲିସୁତା ପିଆରଏଫ ଜଙ୍ଗଲରେ ହାତ ବୋମା ଖଞ୍ଜି ବାରହା ଶିକାର ଅଭିଯୋଗରେ ୪ ଜଣ ଓ ବିଞ୍ଝବାହାଳ ଡିପିଏଫ ଜଙ୍ଗଲରେ ବିଦ୍ୟୁତ ତାର ବିଛାଇ ଭାଲୁ ଶିକାର ଅଭିଯୋଗରେ ୪ ଜଣଙ୍କୁ ଗିରଫ କଲା ବନ ବିଭାଗ ।
ଗିରଫ ଶିକାରୀମାନେ ହେଲେ ତେଲକୋଇ ଥାନା ଅନ୍ତର୍ଗତ ଗୋଳାଗାଡିଆ ଗ୍ରାମର ଲୁଲୁ ମୁଣ୍ଡା, ଗୁରୁଚରଣ ନାୟକ, ଦେଉଳଡିହା ଗ୍ରାମର ସୁରେଶ ମୁଣ୍ଡା, ବାଲେଶ୍ଵର ଗ୍ରାମର କ୍ଷିରୋଦ ନାୟକ, ବିଞ୍ଝବାହାଳ ଗ୍ରାମର କାର୍ତ୍ତିକ ସାହୁ, ବୀରକିଶୋର ସାହୁ, କଣ୍ଟାବାହାଳ ଗ୍ରାମର କାହ୍ନୁ ଜୁଆଙ୍ଗ ଓ ଜଗମୋହନପୁର ଗ୍ରାମର ହବିଲ ମୁଣ୍ଡା। ସେମାନଙ୍କ ନିକଟରୁ ବାରହା ମାଂସ, ହାତ ବୋମା, ବିଦ୍ୟୁତ ତାର, ଲାଠି ଓ ଏକ ଟ୍ରାକ୍ଟର ଜବତ କରାଯାଇଛି।
ଗତକାଲି(ଶୁକ୍ରବାର) ଏସିଏଫଓ ଘନଶ୍ୟାମ ମହାନ୍ତଙ୍କ ନେତୃତ୍ବରେ ବନ ବିଭାଗର ସ୍ବତନ୍ତ୍ର ସ୍କ୍ବାର୍ଡ ଗଠନ କରାଯାଇ ଶିକାରୀଙ୍କୁ ଗିରଫ କରାଯାଇଥିବା ବେଳେ ଆଜି ସମସ୍ତ ଗିରଫ ଶିକାରୀଙ୍କୁ କୋର୍ଟ ଚାଲାଣ କରାଯାଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
