କେନ୍ଦ୍ରାପଡା: ପୂର୍ବ ଶତ୍ରୁତା ପାଇଁ ମହିଳା ଭୁଲିଗଲେ ମାନବିକତା । ରାଗ ସୁଝାଇବାକୁ ବୃଦ୍ଧଙ୍କ ମୁହଁକୁ ଛାଟିଲେ ଗରମ ପାଣି । ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି ହେଲେ ବୃଦ୍ଧ । କେନ୍ଦ୍ରାପଡ଼ା ମହାକାଳପଡ଼ା ଥାନା ଅଧିନ ଅଳାଇଲୋ ଗାଁରେ ଘଟିଛି ଏହି ଅମାନବୀୟ ଘଟଣା । ଗୁରୁତର ବୃଦ୍ଧ ଜଣଙ୍କ ହେଉଛନ୍ତି ରବୀନ୍ଦ୍ର ସେଠୀ । ସୂଚନାନୁଯାୟୀ, ଗ୍ରାମର ସାବିତ୍ରୀ ସେଠୀ ଓ ରବୀନ୍ଦ୍ରଙ୍କ ପରିବାର ଭିତରେ ଦୀର୍ଘଦିନ ଧରି ଜମିବାଡ଼ିକୁ ନେଇ ବିବାଦ ଲାଗି ରହିଥିଲା । ପୂର୍ବରୁ ଦୁଇ ପରିବାର ମଧ୍ୟରେ ତିକ୍ତତା ଲାଗି ରହିଥିବା ବେଳେ ଗତକାଲି (ସୋମବାର) କୌଣସି କାମରେ ରବୀନ୍ଦ୍ର ବାହାରକୁ ଯାଉଥିବାବେଳେ ସାବିତ୍ରୀ ତାଙ୍କ ଉପରେ ଗରମପାଣି ଫିଙ୍ଗିଥିଲେ ।
ଯାହାଫଳରେ ରବୀନ୍ଦ୍ରଙ୍କ ପିଠି ଓ ହାତର ଅନେକ ଅଂଶ ପୋଡି ଯାଇଥିବା ବେଳେ ତାଙ୍କୁ ସଙ୍ଗେସଙ୍ଗେ ଆମ୍ବୁଲାନ୍ସ ଯୋଗେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ତେବେ ଗରମପାଣି ପକାଇଥିବା ମହିଳାଙ୍କୁ ଗାଁର ଶହଶହ ଲୋକେ ଘେରି ରହିଥିବା ବେଳେ ଉତ୍ତେଜନା ବୃଦ୍ଧି ପାଇଥିଲା । ଖବର ପାଇ ମହାକାଳପଡ଼ା ପୋଲିସ ଅଳାଇଲୋ ଗାଁରେ ପହଞ୍ଚି ସାବିତ୍ରୀ ଓ ତାଙ୍କ ସ୍ୱାମୀଙ୍କୁ ଥାନାକୁ ନେଇ ତଦନ୍ତ ଜାରି ରଖିଛି ।
